Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 517 Hüküm no: 585 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Mustafa ile Ayşe bt. Abdullah’ın vekilleri tarafından evlilik akidlerinin yapıldığı Mahrûse-i Üsküdar’da Hadice Hatun Mahallesi sükkânından Ömer Çelebi b. Mustafa tarafından husûs-ı âti’l-beyâna vekîl olduğu İshak Çelebi b. Hüseyin ve Mehmed Çelebi b. Mustafa şehâdetleriyle şer‘an sâbit olan Osman Çavuş b. Abdullah nâm kimesne meclis-i şer‘-i şerîf-i enverde İsmail Çelebi nâm kimesnenin babası ve tarafından kezâlik husûs-ı âti’l-beyâna vekîl olduğu Mehmed Beşe b. Ahmed ve İbrahim Beşe b. Ahmed şehâdetleriyle şer‘an sâbit olan Mustafa Çelebi nâm kimesne mahzarında bi’l-vekâle ikrâr ve takrîr-i kelâm edip müvekkilim mezkûrun ümm-i veledi olan Âişe bt. Abdullah nâm hatunu vekîl-i mezkûr Mustafa Çelebi’nin oğlu müvekkil-i mezkûr İsmail Çelebi’ye üç bin akçe mehr-i müeccel ile şuhûd muvâcehesinde akd ve tezvîc eyledim dedikde vekîl-i mezbûr Mustafa Çelebi dahi oğlu müvekkil-i mezkûr İsmail Çelebi için tezevvüc ve kabûl etmeğin işbu vesîka-i enîka bi’t-taleb ketb olundu. Fî 14 min-Şa‘bâni’l-mu‘azzam sene 1121 Şuhûdü’l-hâl: İshak Çelebi b. Hüseyin, Mehmed Çelebi b. Mustafa, Mehmed Beşe b. Ahmed, İbrahim b. Ahmed, Mustafa Çelebi b. Şa‘ban, Mehmed Çelebi b. Abdullah, Hüseyin Çelebi b. Abdullah, Ali b. İvaz ve gayruhum mine’l-huzzâr.