Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 517 Hüküm no: 586 Orijinal metin no: [85b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed’in geçinemediği kocası Ali Beşe b. Abdülkerim’den boşandığı Mahmiye-i İstanbul’da Çukur Mahallesi sâkinelerinden Fâtıma bt. Mehmed nâm hatun ta‘rîf-i şer‘î ile mu‘arrefe oldukdan sonra meclis-i şer‘-i şerîf-i enverde zevc-i dâhili işbu râfi‘u’l-kitâb Ali Beşe b. Abdülkerim mahzarında ikrâr ve takrîr-i kelâm edip mezbûr Ali Beşe zevcim olup beynimizde hüsn-i zindegānemiz olmamağla mezbûrun zimmetinde mütekarrer ve ma‘kūdün-aleyh olan beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ali Beşe ile muhâla‘a-i sahîha-i şer‘iyye ile hul‘ olduğumda ol dahi vech-i muharrer üzere hul‘-ı mezkûru kabûl ettiğinden sonra hukūk-ı zevciyete müte‘allika olan âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fî 15 min-Şa‘bâni’l-mu‘azzam sene 1121 Şuhûdü’l-hâl: Osman b. Mustafa, Ali Çelebi b. İvaz, Mehmed b. Abdullah, Abdullah b. Abdullah ve gayruhum mine’l-huzzâr.