Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 518 Hüküm no: 587 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Terzi Salıcı Kostantin v. Avramiki v. İstemat’ın alacağı olduğu Dimitri v. Papa Kotori’nin borcunu vasi Dimitri v. Dimo’nun vekilleri Sefer ve Todori’ye ödemesi Mahmiye-i İstanbul’da Fenerkapısı dâhilinde Tahtaminâre Mahallesi ahâlîsinden Dimitri v. Dimo nâm zimmî tarafından ber-vech-i âtî vekâlet iddi‘â eden işbu râfi‘iyü’s-sifr Todori v. Yorgi ve Sefer v. Kirkor nâm zimmîler meclis-i şer‘-i şerîf-i enverde diğer Dimitri v. Papa Kotori muvâcehesinde her biri üzerine da‘vâ ve takrîr-i kelâm edip mahrûse-i Selanik mahallâtından İkişerefeli Mahallesi’nden olup mahmiye-i mezbûrede Bahçekapısı dâhilinde Meydancık nâm mahalde sâkin iken bundan akdem hâlik olan Derzi Salıcı Kostantin v. Avramiki v. İstemat nâm zimmînin cemî‘ mâlını ve zimem-i nâsda olan hukūkunu ahz u kabza ve içinden sülüsünü vücûh-ı birre harc u sarfa yedinde olan hüccet-i şer‘iyye nâtıka olduğu üzere hâlik-i mezbûrun merkūm Dimitri vasiyy-i muhtârı olmağla hâlik-i mezbûrun zimem-i nâsda olan hukūkunu lede’l-hükkâm taleb ve da‘vâ ve ahz u kabza ve kendiye îsâle ve ahz u kabz ve îsâl mütevakkıf olduğu umûrun küllîsine tarafından mezbûr Dimitri bizi vekîl ve nâib-i menâb nasb u ta‘yîn edip biz dahi ber-vech-i muharrer vekâlet-i mezbûreyi baʻde’l-kabûl merâsimini edâya ta‘ahhüd etmişidik hâlik-i mezbûrun merkūm Dimitri zimmetinde cihet-i karz-ı şer‘îden beş guruş hakkı olup kable’l-ahz hâlik olmağla meblağ-ı mezbûru merkūm Dimitri yedinden bi’l-vekâle taleb eylediğimizde edâdan imtinâ‘ eder suâl olunup alıverilmesi matlûbumdur dediklerinde gıbbe’s-suâl mezbûr Dimitri cevâbında hâlik-i mezbûra cihet-i mezbûrdan beş guruş deyni olduğunu ikrâr lâkin mezbûrân Todori ve Sefer merkūm Dimitri tarafından ber-vech-i muharrer vekîller olduğunu inkâr edicek müdde‘iyân-ı mezbûrândan müdde‘âlarını mübeyyine beyyine taleb olundukda mahmiye-i mezbûrede Altımermer Mahallesi sükkânından Todori v. Şahin ve Dimitri v. Papa Hristo ve Kostantin v. Nikola nâm zimmîler li-ecli’ş-şehâde meclis-i şer‘a hâzirûn olup istişhâd olunduklarında fi’l-hakīka hâlik-i mezbûr Kostantin v. Avramiki v. İstemat’ın sülüs-i mâlını vücûh-ı birre harc u sarfa vasiyy-i muhtârı olan Dimitri v. Dimo nâm zimmî hâlik-i mezbûrun sülüs-i mâlına vasiyy-i muhtârı olup zimem-i nâsda olan hukūkunu lede’l-hükkâm da‘vâ ve taleb ve ahz u kabza ve kendiye îsâle ve ahz u kabz ve îsâl mütevakkıf olduğu umûrun küllîsine tarafından bizim huzûrumuzda işbu mezbûrân Todori ve Sefer’i vekîl ve nâib-i menâb nasb u ta‘yîn edip onlar dahi ber-vech-i muharrer vekâlet-i mezbûreyi kabûl ve merâsimini edâya ta‘ahhüd eylediler biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mezbûrânın vekâletlerine baʻde’l-hükm meblağ-ı mezbûru mezbûrâna edâ ve teslîme mezbûr Dimitri’ye tenbîh-birle mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Mehmed Çelebi Kethüdâ-yı muhzırân, Ali b. İvaz, Abdullah b. Abdullah, Süleyman b. Abdullah ve gayruhum mine’l-huzzâr.