Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 519 Hüküm no: 588 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakut bt. Manuk’un tasarrufunda olan vakıf menzili eski kiracısı olan Aritun v. Şahri’ye tekrar kiraladığı Mahmiye-i İstanbul’da Ayvansarıkapısı [Ayvansaray] dâhilinde Koca Mustafa Paşa Mahallesiʼnde sâkine zâtı ta‘rîf-i şer‘î ile mu‘arrefe olan Yakut bt. Manuk nâm Nasrâniye meclis-i şer‘-i şerîf-i enverde işbu râfi‘u’s-sifr Aritun v. Şahri nâm zimmî muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafdan ( ) nâm kimesne menzili ve bir tarafdan Aritun zimmî menzili ve bir tarafdan Hançerli sarayı ve bir tarafdan tarîk-i âm ile mahdûd merhûm Gāzî Hasanpaşa Vakfı’ndan icâreteyn-i ma‘lûmeteyn ile taht-ı tasarrufumda olan vakıf menzili bundan akdem bâ-ma‘rifet-i mütevellî mezbûr Aritun’a yüz guruş bedel-i makbûz mukābelesinde ferağ-ı kat‘î ile ferağ ve tefvîz ol dahi tefevvüz ve kabûl eylediğinden sonra menzil-i mezkûrda mukaddemâ sâkin olmağla zimmetinde on beş guruş ücret müctemi‘ olmuşdur deyü mezbûr Aritun’dan da‘vâya tasaddî eylediğimde beynimize muslihûn tavassut edip yine izn-i mütevellî ile menzil-i mezkûru mezbûr Aritun’a yüz yirmi beş guruş bedel mukābelesinde ferağ-ı kat‘î ile ferağ ve tefvîz ben dahi tefevvüz ve kabûl edip bedel-i mezkûru yedinden tamamen ahz u kabz eylediğimden sonra menzil-i mezkûra ve istîfâsına ve târih-i rakīme gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan mezbûr Aritun’un zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Şa‘bâni’l-mu‘azzam sene 1121 Şuhûdü’l-hâl: Abdullah Ağa b. Ali el-Mübâşir, Mehmed Çelebi b. Abdi Kethüdâ-yı muhzırân, Abdullah Çelebi b. Abdullah, Ali Çelebi b. İvaz, Hasan b. Mustafa, el-Hâc İsmail b. Hüseyin, Molla İbrahim b. Resul, Mehmed Çelebi b. Abdi, Mustafa b. Abdullah, Ali b. Bâli ve gayruhum mine’l-huzzâr.