Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 519 Hüküm no: 589 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İznikmid’de Abdüsselam Bey Vakfı’nın vefât eden mütevellîsi Hacı Ahmed’in yerine kızı Fâtıma’nın mütevellî olup babasının vakıfta olan alacağını da vakfa bağışladığı Medîne-i İznikmid’de vâki‘ merhûm Abdüsselam Bey nâm sâhibü’l-hayrın evkāfına evlâdiyet ve meşrûtiyet üzere sâbıkā mütevellî olduğundan sonra vefât eden el-Hâc Ahmed’in sulbiye kebîre kızı işbu râfi‘atü’l-kitâb Fâtıma nâm hatun mahfil-i kazâda yine evlâd-ı vâkıfdan Silistreli es-Seyyid Mustafa b. es-Seyyid Mehmed nâm kimesne mahzarında takrîr-i da‘vâ ve tasvîr-i müdde‘â edip evlâd-ı vâkıfdan olup her vechile eslah ve tevliyete ehakk iken mezbûr es-Seyyid Mustafa bî-vech tevliyete müdâhale eder hâlâ vakfiye-i ma‘mûlün-bihâsına nazar ve ikimizin dahi eslahiyyeti hakīkat-ı vukūfu olan bî-garaz Müslimînden istihbâr ve hüccet olunmak matlûbumdur deyü vâkıf-ı mezbûrun sahîha ve ma‘mûlün-bihâ olan bir kıt‘a vakfiyesini ibrâz edip nazar olundukda vâkıf-ı mezbûr vakfının tevliyeti ebnâsına ve ebnâ-yı ebnâsına şart edip ve mezbûr es-Seyyid Mustafa’nın senedi müzevver olup ikisi dahi evlâd-ı benâtdan olduğu [86b] mütebeyyin olup lâkin mezbûrlar evlâd-ı benâtdan olmağla cedlerinin tevliyetine ehil ve eslah oldukları takdîrce ecânibden evlâ oldukları mukarrer olmağın evvelen mezbûr es-Seyyid Mustafa’nın eslahiyyeti istihbâr olundukda Hasköy ahâlîsinden İmâm Ahmed Efendi b. Mustafa ve Müezzin Mustafa b. Mustafa ve el-Hâc Mustafa b. Mehmed ve Mehmed b. Hüseyin ve Musa b. Mahmud ve Eyüb Ağa b. Ca‘fer nâm kimesneler mahfil-i kazâya hâzirûn olup mezbûr es-Seyyid Mustafa eslahdır deyü istihbâr ettiklerinden sonra mezbûre Fâtıma Hatun’un dahi eslahiyyeti istifsâr olundukda mahmiye-i İstanbul’da Veled-i Karabaş Mahallesi ahâlîsinden İmâm Mehmed Efendi b. Hasan ve Hasan Efendi b. Mustafa ve Ebûbekir Efendi b. Mehmed ve Receb Çelebi b. Şa‘ban ve Mustafa b. Ali ve Mehmed Ağa b. Mustafa ve Hasan Ağa b. Mustafa ve Musa b. Mustafa ve el-Hâc İsmail b. İbrahim ve Mehmed Çelebi b. Hüseyin ve Ahmed b. Yusuf ve Ali Efendi b. Ahmed ve İsmail b. Ahmed ve Hüseyin Çelebi b. Ali ve Mustafa Odabaşı ve Hasan b. Mehmed ve Mustafa b. İbrahim ve Tartus imâmı Ali Efendi b. Osman ve Mehmed b. Mustafa ve Abdi b. Hasan ve es-Seyyid Abdülkerim b. Ahmed ve Ali b. Mustafa ve İbrahim b. Ali ve Ahmed Beşe b. Hamza ve Ali b. Mehmed ve el-Hâc Mustafa b. Hüseyin ve Hüseyin b. Mustafa ve Ahmed b. Ramazan ve Ahmed b. İsmail ve Ali Ağa ve Mehmed b. Ebûbekir ve İsmail b. Mustafa ve Halil b. Mustafa ve Hasan b. İbrahim ve Hasan b. Mustafa ve el-Hâc Hasan b. Mehmed ve Mehmed b. Mustafa ve İbrahim b. Mehmed ve Mehmed b. İbrahim ve Karabaş müezzini Halil ( ) ve Hüseyin b. Yusuf ve Ali Efendi b. Hüseyin ve Ömer b. Mehmed ve Abdi b. Mahmud ve el-Hâc Musa b. İbrahim nâm kimesneler li-ecli’l-ihbâr mahfil-i kazâya hâzirûn olup istihbâr olunduklarında fi’l-vâki‘ mezbûre Fâtıma Hatun evlâd-ı vâkıfdan olup tevliyete her vechile eslah ve ahrâ ve elyakdır ve ahvâli muntazam olmağla vakfa enfa‘dır ve mezbûrenin eğer vakfa bir dürlü zararı isâbet eder ise cümlemiz dâminler ve mütekeffilleriz deyü her biri ihbâr edip ve mezbûre Fâtıma babasının hîn-i tevliyetinde taraf-ı vakfda zuhûr eden alacağı kırk bin akçeyi dahi vakfa teberru‘ etmeğin mezbûre Fâtıma’nın vakfa enfa‘ olduğu zâhir olmağla mâ-vaka‘a bi’t-taleb ketb olundu. Fî 16 min-Recebi’l-ferd sene 1121 Şuhûdü’l-hâl: el-Hâc Mustafa Efendi, Ali Efendi b. Osman el-İmâm, Mehmed Efendi b. Abdurrahman, Ahmed b. Yusuf, Hasan Efendi b. Mustafa, Mustafa b. Ali, Mehmed b. Hasan, Mehmed b. Mustafa, İsmail b. Ahmed, Hüseyin b. Ali, Mustafa b. Ali ve gayruhum mine’l-huzzâr.