Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 521 Hüküm no: 590 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa b. Abdullah’ın firar eden Rus asıllı cariyesini satın almış olan İbrahim Çelebi b. Bâli’nin cariyeyi Yusuf Ağa’ya teslim ettiği Mahmiye-i İstanbul’da Davudpaşa Mahallesiʼnde sâkin işbu râfi‘u’l-kitâb Yusuf Ağa b. Abdullah nâm kimesne dîvân-ı hazret-i sadr-ı aʻzamîde ma‘kūd mahfil-i kazâda İbrahim Çelebi b. Bâli nâm kimesne mahzarında üzerine da‘vâ ve takrîr-i kelâm edip işbu kasîrü’l-kāme açık kaşlı sarı elâ gözlü Rusiyyetü’l-asl Seyfi nâm câriyeyi târih-i kitâbdan altı sene mukaddem bir esirciden semen-i ma‘lûma iştirâ etmekle mülk-i müşterâm iken firâr etmekle hâlâ medîne-i Mağnisa’da [Manisa’da] mezbûr İbrahim Çelebi yedinde buldum bi-gayr-ı hakkın vaz‘-ı yed etmekle suâl olunup alıverilmesi matlûbumdur dedikde gıbbe’s-suâl mezkûr İbrahim cevâbında mevsûfe-i mezbûreyi târih-i kitâbdan beş ay mukaddem Mağnisa’da [Manisa’da] Ali Beşe nâm kimesneden iki yüz yedi guruş semen-i medfû‘a iştirâ etmekle vaz‘-ı yed <> ederim müdde‘î-i mezbûrun mülkü olduğu ma‘lûmum değildir deyücek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Kemal Paşa Mahallesiʼnde sâkin Mehmed Ağa b. Mustafa ve Sultan Bayezid kurbünde sâkin Mustafa Çelebi b. Mehmed nâm kimesneler li-ecli’ş-şehâde meclis-i mezkûra hâzırân olup isre’l-istişhâd fi’l-hakīka müdde‘î-i mezbûr Yusuf Ağa mevsûfe-i mezbûre Seyfi’yi târih-i kitâbdan altı sene mukaddem bir esirciden semen-i ma‘lûm ve medfû‘a bizim huzûrumuzda iştirâ etmekle mülk-i müşterâsıdır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebiyle mevsûfe-i mezbûreyi müdde‘î-i mezbûra teslîme mezbûr İbrahim’e ba‘de’t-tenbîh mezkûr İbrahim dahi mevsûfe-i mezkûre Seyfi’yi müdde‘î-i mezbûra teslîm etmeğin mâ-vaka‘a bi’t-taleb ketb olundu. Fî 5 min-Şa‘bâni’l-mu‘azzam sene 1121 Şuhûdü’l-hâl: el-Hâc Mustafa Efendi, Mehmed Efendi el-Kâtib, el-Hâc Hüseyin Beşe, Bıçakçı Hüseyin Beşe, el-Hâc Mehmed, Halil Çelebi, diğer el-Hâc Mehmed, el-Hâc Osman ve gayruhum mine’l-huzzâr.