Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 522 Hüküm no: 591 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarracbaşı Ahmed Efendi’den çocukları İbrahim ve Halil’e intikal eden boyahanedeki hisselerinin satışı için vasileri Ahmed Çelebi b. İbrahim’e izin verildiği Mahmiye-i İstanbul’da Çıkrıkçı Kemal Mahallesiʼnde sâkin iken bundan akdem vefât eden Sarracbaşı Ahmed Efendi nâm kimesnenin sagīr oğulları İbrahim ve Halil’in tesviye-i emrlerine vasiyy-i muhtârları olan Ahmed Çelebi b. İbrahim nâm kimesne meclis-i şer‘-i şerîf-i enverde takrîr-i kelâm ve bast-ı merâm edip merhûm Sekbanbaşı Ya‘kub Ağa Vakfı’ndan olup yine mârru’z--zikr Sekbanbaşı Ya‘kub Ağa Mahallesiʼnde vâki‘ lede’l-ahâlî ve’l-cîrân ma‘lûmü’l-hudûd boyahânenin yedi sehm i‘tibârıyla iki sehm-i şâyi‘i sagīrân-ı mezbûrânın taht-ı tasarruflarında olup lâkin zikr olunan boyahâne sagīrân-ı mezbûrânın adem-i iktidârlarına binâen ta‘mîr ve meremmet olunmamağla harâba ve mâil-i türâb [87a] olup kimesne rağbet etmemekle âhar hisse sâhibleri âhara ferağ murâd edip yalnız sagīrân-ı mezbûrânın iki sehm hisseleri müntefi‘ bahâ olmamağla sagīrân-ı mezbûrânın hisseleri dahi sâir hisse sâhibleri ile ferağ ve sagīrân-ı mezbûrâna isâbet eden bedel-i ferağı istirbâh ve istiğlâl olunmak sagīrân-ı mezbûrân haklarında her vechile evlâ ve enfa‘ olmağla hakīkat-i hâl bî-garaz Müslimînden istihbâr olunup ber-vech-i muharrer kıbel-i şer‘den bana izin verilmek bi’l-vesâye matlûbumdur dedikde husûs-ı mezbûr zeyl-i kitâbda muharrerü’l-esâmî Müslimîn ve sikāt-ı muvahhidînden istihbâr olundukda onlardan her biri dahi kaziyye bi’l-cümle vasiyy-i mezbûrun takrîr-i meşrûhu üzere idiğini haber vermeleriyle mûcebince vasiyy-i mezbûra kıbel-i şer‘den izin-birle ve mâ-vaka‘a bi’t-taleb ketb olundu. Fî 10 min-Şa‘bâni’l-mu‘azzam sene 1121 Şuhûdü’l-hâl: Es-Seyyid Mahmud Efendi b. es-Seyyid Mehmed, Mehmed Efendi b. Mehmed, Mehmed Odabaşı b. Mehmed, Osman Çelebi b. el-Hâc Mustafa, Mehmed Çelebi b. Süleyman, Hasan Çelebi b. Hüseyin, Hüseyin Çelebi b. Derviş ve gayruhum mine’l-huzzâr.