Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 522 Hüküm no: 592 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Muhyiddin Mahallesi’ndeki işletmede bıçak ile yaralanan Hasan b. Sinan’ı Vito adlı şahsın yaraladığının tescili Mahmiye-i İstanbul’da el-Hâc Muhyiddin Mahallesiʼnde vâki‘ Löküncü kârhânesinde sâkin Hüseyin b. Süleyman nâm kimesne meclis-i şer‘-i şerîf-i enverde takrîr-i kelâm edip târih-i kitâb günü mârru’z--zikr kârhânede sâkin Hasan b. Sinan nâm kimesneyi ma‘lûmum olmayan kimesne boğazından ve göğsünden bıçak ile darb ve cerh edip hâlâ nutka kādir olmağla cânib-i şer‘den üzerine varıp keşf ve cârihi suâl ve kıbel-i şer‘den vesîka tahrîr olunmak matlûbumdur ve fermân-ı âlî dahi ibrâz etmeğin savb-ı şer‘-i enverden Mevlânâ Fazlullah Efendi irsâl olunup ol dahi mahalle-i mezkûra varıp zeyl-i kitâbda muharrerü’l-esâmî olan huzûrunda akd-i meclis ve mecrûh-ı mezkûrun a‘zâsına nazar olundukda fi’l-hakīka mecrûh-ı mezbûr Hasan’ın boğazında ve göğsünde bıçak yarası olduğunu müşâhede eyledikden sonra cârihinden suâl olundukda beni târih-i kitâb günü Vito nâm zimmî bi-gayr-ı hakkın bıçak [ile] darb ve cerh eyledi eğer cerh-i mezbûreden müteessir[en] vefât edersem dem ve diyetim mezbûr Vito zimmîden gayrı kimesne mesûl olmasın dedikde vâki‘ hâli mevlânâ-yı mezbûr mahallinde tahrîr edip ba‘dehû ma‘an irsâl olunan Mehmed Beşe ve Muhzır Süleyman ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam li-sene ihdâ ve işrîn ve miʼete ve elf. Şuhûdü’l-hâl: Abdullah b. Abdullah, Salih b. Abdullah, Ömer Çelebi b. Mustafa, Mustafa Çelebi [b.] Halil, Halil Beşe b. Veli ve gayruhum mine’l-huzzâr.