Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 524 Hüküm no: 594 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Kirkor’a borcu olan Arslan v. Orya ile Zakar v. Abraham’ın borçlarını ödemelerinin tembih edildiği Mahmiye-i İstanbul’da Pertev Paşa Hanı’nda sâkin işbu râfi‘u’s-sifr Bedros v. Kirkor nâm zimmî meclis-i şer‘-i şerîf-i enverde Arslan v. Orya nâm Yahûdi ve Zakar v. Abraham zimmî muvâcehelerinde üzerlerine da‘vâ ve takrîr-i kelâm edip bundan akdem yedimden iştirâ ve kabz eylediği beynimizde ma‘lûm alaca bahâlarından mezbûr Arslan zimmetinde yirmi yedi buçuk guruş ve mezbûr Zakar’ın emriyle yine mezbûr Arslan’a bey‘ ve teslîm ol dahi yedimden ahz u kabz eylediği zumpara bahâsından dahi sekiz guruş emrine binâen mezbûr Zakar zimmetinde hakkım olup hâlâ meblağayn-ı mezbûreyni mezbûrân Arslan ve Zakar’dan taleb ederim suâl olunup alıverilmesi matlûbumdur [dedikde] gıbbe’s-suâl mezbûr Arslan cevâbında beynimizde ma‘lûm zikr olunan alaca bahâlarından zimmetinde yirmi yedi buçuk guruş ve mezbûr Zakar dahi beynlerinde ma‘lûm zumpara bahâsından zimmetinde sekiz guruş müdde‘î-i mezbûr Bedros’a deynleri olduğunu her biri ikrâr u i‘tirâf etmeğin alâ-mûcebi i‘tirâfihimâ meblağayn-ı mezkûreyn otuz beş buçuk guruşu müdde‘î-i mezbûr Bedros’a edâ ve teslîme mezbûrân Arslan ve Zakar’ın her birine tenbîh olunup mâ-vaka‘a bi’t-taleb ketb olundu. Fî 13 min-Şa‘bâni’l-mu‘azzam sene 1121 Şuhûdü’l-hâl: Mehmed Çavuş el-Mübâşir, Mustafa Çelebi b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.