Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 525 Hüküm no: 595 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Hasan’ın Molla Hüsrev Mahallesi’ndeki evini istiğlal yoluyla İbrahim b. Abdullah’a satıp tekrar kiraladığı Mahmiye-i İstanbul’da Molla Hüsrev Mahallesiʼnde sâkine olup zâtı ta‘rîf-i şer‘î ile mu‘arrefe olan Emine bt. Hasan nâm hatun meclis-i şer‘-i şerîf-i enverde işbu râfi‘u’l-kitâb İbrahim b. Abdullah nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan merhûm Hüseyin Paşa değirmeni ve bir tarafdan merhûm Rüstempaşa Vakfı’ndan olan odalar ve iki tarafdan tarîk-i âm ile mahdûd büyût-ı adîdeyi müştemil mülk menzilimi bi-cümleti’t-tevâbi‘ ve’l-levâhık merkūm İbrahim Çelebi’ye yüz guruşa bi-tarîkı’l-istiğlâl bey‘ ve teslîm eylediğimde ol dahi iştirâ ve tesellüm ve kabûl edip semeni olan meblağ-ı mezbûr yüz guruşu mezbûr İbrahim yedinden tamamen ahz u kabz ettiğimden sonra mezbûr İbrahim menzil-i mahdûd-ı merkūmu ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yine bana sekiz guruşa îcâr ve teslîm ben dahi istîcâr ve tesellüm eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Ahmed Çelebi b. Ali, Mehmed b. Ramazan, İbrahim Çelebi b. Osman, Yusuf b. Abdullah, Abdülkerim b. Ahmed, Ali b. İvaz, Mehmed b. Ahmed, Ahmed b. Osman ve gayruhum mine’l-huzzâr.