Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 526 Hüküm no: 596 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed b. Mustafa’nın menzilini satın aldığı Ahmed Çelebi b. Osman’ın zimmetini ibra ettiği Mahmiye-i İstanbul’da Keçeci Pîrî Mahallesiʼnde sâkin el-Hâc Ahmed b. Mustafa nâm kimesne meclis-i şer‘-i şerîf-i enverde hâfızu hâze’l-kitâb Ahmed Çelebi b. Osman nâm kimesne mahzarında ikrâr ve takrîr-i kelâm edip mezbûr Ahmed Çelebi Medîne-i münevvere Vakfı’na ayda on akçe icâre-i müeccele ile taht-ı tasarrufunda olup mahalle-i mezbûrede vâki‘ bir tarafdan Sâliha Hatun menzili ve bir tarafdan Sultan Bayezid-i Velî vakfı olan bostan ve bir tarafdan Abdullah Ağa tasarrufunda olan vakıf menzil ve bir tarafdan tarîk-i âm ile mahdûd bir bâb fevkānî oda ve bir sofa ve iki bâb tahtânî oda ve bir kuyu ve kenîf ve bahçeyi müştemil vakıf menzilini cümle tevâbi‘i ile bundan akdem izn-i mütevellî ile iki yüz guruş bedel mukābelesinde bana ferağ ve tefvîz ben dahi ber-vech-i muharrer tefevvüz ve kabûl edip bedel-i ferağ olan meblağ-ı mezbûr iki yüz guruşu tamamen yedimden ahz u kabz etmişidi hâlâ menzil-i mahdûd-ı mezbûrun istîfâsına müte‘allika olan âmme-i da‘vâdan mezbûr Ahmed Çelebi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 13 min-Şa‘bâni’l-mu‘azzam sene 1121 Şuhûdü’l-hâl: Ali Çelebi b. Ahmed, Mustafa Odabaşı b. Mehmed, Abdülaziz Beşe b. Osman, Mustafa Çelebi b. Receb ve gayruhum mine’l-huzzâr.