Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 527 Hüküm no: 599 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülizar bt. Azerni ile kardeşi Maryem’in evini zapt eden David v. Haçador’la sulh yoluyla anlaşarak sattıkları Fi’l-asl vilâyet-i Anadolu’da Kayseriye kazâsına tâbi‘ Ova nâhiyesinde Mancisun nâm karye ahâlîsinden olup hâlâ mahmiye-i İstanbul’da Cebecibaşı Mahallesi’nde müsâfiren sâkine ve zâtı ta‘rîf-i şer‘î ile mu‘arrefe olan Gülizar bt. Azerni nâm Nasrâniye asâleten ve mezkûrenin li-ebeveyn kız karındaşı olup hâlâ karye-i mezbûrede sâkine Maryem nâm Nasrâniye tarafından husûs-ı âti’z-zikre vekîl olduğu Kirkor v. Banos ve Begos v. Toros nâm zimmîler şehâdetleriyle şer‘an sâbit olan Agop v. Kirkor nâm zimmî vekâleten meclis-i şer‘-i şerîf-i enverde işbu râfi‘u’s-sifr David v. Haçador nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip mezbûr David karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mezbûr Azerni zimmîden müntakil mülk menzili mezkûr David yirmi seneden beri fuzûlî zabt etmekle biz dahi bi’l-asâle ve bi’l-vekâle menzil-i mezbûru mezkûr David’den taleb ve da‘vâya tasaddî eylemişidik el-hâletü hâzihî beynimize muslihûn tavassut edip bizimle mezbûr David’i da‘vâ-yı mezkûremizden on iki guruş üzerine sulh eylediklerinde biz dahi bi’l-asâle ve bi’l-vekâle sulh-ı mezbûru kabûl ve bedel-i sulh olan meblağ-ı mezbûr on iki guruşu mezkûr David yedinden tamamen ahz u kabz edip menzil-i mezkûra müte‘allika âmme-i da‘vâdan mezbûr David’in bi’l-asâle ve bi’l-vekâle zimmetini ibrâ-i âm ile ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Şa‘bâni’l-mu‘azzam sene 1121 Şuhûdü’l-hâl: Mehmed b. Mustafa, diğer Mehmed b. Hüseyin, Çalık Mehmed b. Abdullah, Mustafa Çelebi b. Şa‘ban, Hasan b. Abdullah ve gayruhum mine’l-huzzâr. İskender v. Matyad, Sipali v. İskender, Abraham v. Haçador, Begos v. Toros, Kirkor v. Panos, Şahin v. Karakoç, Abram v. Haçik, Melkest? v. Panos