Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 532 Hüküm no: 605 Orijinal metin no: [88b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abaz v. Kirne’nin Üskübî köyündeki bağ ve bahçesini oğlu Sanan’a sattığı Fi’l-asl vilâyet-i Anadolu’da Kayseriye kazâsına tâbi‘ Üskübî nâm karye ahâlîsinden olup hâlâ mahmiye-i İstanbul’da Sultan Mehmed Hân aleyhi’r-rahmetü ve’l-gufrân câmi‘-i şerîfi kurbünde müsâferet vechi üzere sâkin Abaz v. Kirne nâm zimmî meclis-i şer‘-i şerîf-i enverde işbu râfi‘u’s-sifr sulbî oğlu Sanan nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan [Defterin ciltleme esnasında sayfaları karıştırılmış olduğundan bu hükmün devamı [90b]’de] [90b’de] Bağcıoğlu bağı ve bir tarafdan Ayan nâm zimmî bağı ve bir tarafdan Kiş nâm zimmî bağı ve bir tarafdan Kaspar zimmî bağı ile mahdûd bir kıt‘a mülk bağımı ve yine karye-i mezbûre kurbünde vâki‘ lede’l-ahâlî ve’l-cîrân ma‘lûmü’l-hudûd bir kıt‘a bahçemi bi-safkatin vâhidetin oğlu mezbûr Daman’a? tarafeynden îcâb ve kabûlü hâvî bey‘-i bâtt-ı sahîh-i şer‘î ile on beş guruşa bey‘ ve temlîk ol dahi ber-vech-i muharrer iştirâ ve temellük ve kabûl eylediğinden semeni olan meblağ-ı mezbûr on beş guruşu oğlum mezbûr Sanan yedinden tamamen ahz u kabz edip mârru’z-zikr bağ ve bahçeyi mahallerinde kabza mezbûru taslît eyledim ba‘de’l-yevm zikr olunan bağ ve bahçe mezbûr Daman’ın? mülk-i müşterâsı olup benim kat‘â alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 min-Şa‘bâni’l-mu‘azzam sene 1121 Şuhûdü’l-hâl: el-Hâc Hasan b. Sefer, Mustafa Çelebi b. Şa‘ban, Abdullah b. Abdullah, Ali b. İvaz ve gayruhum mine’l-huzzâr. Papa Simyon v. Yasef, Todori v. Sava, Şahbaz v. Yasef