Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 533 Hüküm no: 606 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah b. Abdullah’ın mücevherini eksik fiata sattığı iddiasıyla Mihayil v. Saltanaş’a açtığı davada sulh oldukları Mahmiye-i İstanbul’da Kalenderhâne Mahallesi'nde sâkine olup işbu hâzır bi’l-meclis es-Seyyid İsmail b. el-Hâc Hüseyin’in zevcesi Âişe bt. Abdullah b. Abdurrahman nâm hatun tarafından vech-i âtî üzere sulh ve ibrâya vekîl olduğu zâtını ârifûn Kırkçeşme kurbünde sâkin es-Seyyid Mehmed Çelebi b. Ahmed ve Uzun Şücâ‘ Mahallesi'nde sâkin Ahmed b. Abdülcelil ve Kalenderhâne’de sâkin es-Seyyid Mehmed b. Mustafa ve Akarçeşme’de sâkin Ahmed b. Abdülkerim nâm kimesneler şehâdetleriyle hâkim-i muvakki‘-ı sadr-ı kitâb hazretleri huzûrunda alâ-vechi’l-hasm sâbit ve sübût-ı vekâletine hüküm lâhık olan es-Seyyid Mehmed Çelebi b. es-Seyyid İbrahim nâm kimesne mahfil-i kazâda işbu râfi‘u’s-sifr Mihayil v. Saltanaşa nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûre Âişe Hatun bundan akdem bir elmas cevâhir kuşağını zevci işbu mezbûr es-Seyyid İsmail Çelebi yediyle âhara bey‘ için merkūm Mihayil’e teslîm ol dahi ba‘de’l-kabz bin altı yüz guruşa âhara bey‘ ve semenini kabz edip semen-i mezbûru mezbûr es-Seyyid İsmail’e verip ol dahi mezbûre Âişe’ye teslîm edip mârru’z--zikr kuşağın kıymeti beş kîse akçe olmağla semen-i mislinden noksan-ı fâhiş ile bey‘ etmişsiz deyü merkūm Mihayil’den bi’l-vekâle da‘vâ ettiğimde ol dahi semen-i misli beş kîse akçe olduğunu münkir olup bu vech üzere beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremden merkūm Mihayil benimle yüz guruş ve meclis-i sulhde mevcûd üç zirâ‘ üçer guruş kıymetli londrine çuka üzerine sulh oldukda ben dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûr yüz guruş ile üç zirâ‘ çukayı merkūm Mihayil’den bi’l-vekâle ahz u kabz ettiğimden sonra husûs-ı mezbûra ve mârru’z--zikr kuşağa ve semenine müte‘allika âmme-i de‘âvî ve mutâlebâtdan vekâlet-i mahkiyem hasebiyle merkūm Mihayil’in zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ba‘de’l-yevm müvekkilemin merkūm Mihayil ile husûs-ı mezkûra müte‘allika da‘vâ ve nizâ‘ı kalmamışdır dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî-selhi Cumâdelâhire sene 1121 Şuhûdü’l-hâl: el-Hâc Mustafa Efendi Kethüdâ-yı efendi, el-Hâc Hüseyin Beşe Çukadâr, el-Hâc Mehmed Çelebi tâbi‘-i efendi, Mehmed Çelebi Kethüdâ-yı muhzırân, Mehmed Çelebi b. ( ), es-Seyyid Mehmed b. Ahmed, Ahmed Çelebi b. ( ), Mehmed Efendi İmâmzâde, Hancı Ali Ağa b. Mehmed, Osman Ağa b. Mehmed, Odabaşı Ali Bey, Kâtibü’l-hurûf Hacı Mustafa b. Hüseyin, Attâr Hacı Hüseyin b. Abdullah, el-Hâc Ahmed b. Himmet, İsmail Çelebi b. el-Hâc Mustafa, Ahmed Ağa b. Hasan.