Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 534 Hüküm no: 607 Orijinal metin no: [89a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim Osman Ağa b. Yusuf’un vasiyetine kardeşinin oğlu Yusuf Efendi b. Mahmud’u vasi tayin ettiği Mahmiye-i İstanbul’da Akşemseddin Mahallesi'nde sâkin Za‘îm Osman Ağa b. Yusuf tarafından husûs-ı âti’l-beyâna vekîl olduğu Osman Efendi b. Şa‘ban ve Ahmed b. İbrahim şehâdetleriyle sâbit olan Eyüb Ağa b. Mehmed nâm kimesne mahfil-i kazâda müvekkil-i mezbûrun karındaşı oğlu Yusuf Efendi b. Mahmud mahzarında bi’l-vekâle ikrâr ve takrîr-i kelâm edip müvekkil-i mezbûr bi-irâdeti’l-meliki’l-müte‘âl dâr-ı cezâya irtihâl ettiğimde sülüs-i mâlımdan kadr-i kifâye techîz ve tekfîn ve levâzım-ı defn görülüp ba‘dehû yine kifâyet mikdârı iskāt-ı salât ve keffâret-i savm ve nüzûr ve hukūk-ı ibâd için dahi harc u sarf olundukdan sonra sülüs-i mezkûrdan hizmetkârım olan Süleyman’a kendiye hâlâ rükûb için verdiğim beynimizde ma‘lûm at ve esvâbı verile ve on guruş dahi verile ve Yusuf’a dahi bendeki at ve esvâbı verile ve on guruş dahi verile ve Gürcü Mustafa’ya on guruş ve Fâtıma’ya on guruş verile ve zevcemin üç câriyesine beşer guruş her birine verile deyü vasiyet edip tenfîzine mezbûr Yusuf Efendi’yi vasiyy-i muhtâr nasb ve ihtiyâr eyledi dedikde ol dahi vesâyet-i mezkûreyi kabûl ve merâsimini edâya ta‘ahhüd etmeğin mâ-vaka‘a bi’t-taleb ketb olundu. Fî 9 min-Şa‘bâni’l-mu‘azzam sene 1121 Şuhûdü’l-hâl: Ahmed Efendi b. Muharrem, Ahmed b. İbrahim, İbrahim Ağa b. ( ), Osman Efendi b. Şa‘ban, Mehmed b. Mustafa, Eyüb Ağa b. ( ), Süleyman Çelebi, Yusuf Çelebi b. ( ) ve gayruhum mine’l-huzzâr.