Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 535 Hüküm no: 609 Orijinal metin no: [89a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Mustafa’nın Mehmed Efendi b. Habib’de olan alacağını sulh yoluyla tahsil ettiği Vilâyet-i Anadolu’da Bayramiç kazâsına tâbi‘ Türkmenli nâm karye sükkânından Mahmud b. Mustafa nâm kimesne meclis-i şer‘-i şerîf-i enverde işbu bâ‘isü’l-kitâb Mehmed Efendi b. Habib nâm kimesne mahzarında ikrâr ve takrîr-i kelâm edip mezbûr Mehmed Efendi kazâ-i mezbûrede bundan akdem hilâfet-i hâkimü’ş-şer‘i’ş-şerîf oldukda bi-gayr-ı hakkın benim yüz elli guruşumu ahz u kabz etmekle meblağ-ı mezbûru mezkûr Mehmed Efendi’den taleb ve da‘vâ eylediğimde ol dahi inkâr etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Mehmed Efendi ile yirmi altı buçuk guruş ile dört buçuk guruş kıymetli bir sarık ki cem‘an otuz bir guruş üzerine an-inkârin sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr otuz bir guruşu mezbûr Mehmed Efendi yedinden ahz u kabz eylediğimden sonra meblağ-ı bâkī yüz on dokuz guruşa ve sâir târih-i kitâba gelince hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan mezbûr Mehmed Efendi’nin zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam sene 1121 Şuhûdü’l-hâl: Süleyman Efendi b. Mehmed, Salih Çelebi b. Sâdık, Mehmed b. Mustafa, Monla Mehmed b. Abdullah, Monla Mahmud b. Mustafa, Derzi Hüseyin Çelebi b. Ali, Mustafa Çelebi b. Şa‘ban, Ali b. İvaz, Ali b. Bâli ve gayruhum mine’l-huzzâr.