Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 536 Hüküm no: 610 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Zoto v. Pavlo’nun Bahçıvan Dimo’da olan alacağının kefili İstavrid v. Pano’nun ödemesi Bahçıvân tâifesinden işbu bâ‘isü’s-sifr Zoto v. Pavlo nâm zimmî meclis-i şer‘-i şerîf-i enverde İstavrid v. Pano nâm zimmî muvâcehesinde üzerine da‘vâ ve takrîr-i kelâm edip benim gāib ani’l-meclis Bahçıvân Dimo nâm zimmî zimmetinde cihet-i deyn-i şer‘îden yetmiş altı guruş hakkım olmağla mezbûr İstavrid zimmî bundan akdem meblağ-ı mezbûr yetmiş altı guruşa tarafeynden emr ve kabûlü hâviye kefâlet-i sahîha-i şer‘iyye ile kefîl olmağın hâlâ meblağ-ı mezbûru bi-hükmi’l-kefâlet mezbûr İstavrid zimmîden taleb ederim suâl olunup edâsına tenbîh olunmak murâdımdır dedikde gıbbe’s-suâl mezbûr İstavrid cevâbında müdde‘î-i mezbûrun gāib-i mezbûr Dimo zimmetinde cihet-i deyn-i şer‘îden yetmiş altı guruş hakkına bi’l-emr ve’l-kabûl kefîl olduğunu ikrâr u i‘tirâf etmeğin alâ-mûcebi i‘tirâfihî meblağ-ı mezbûr yetmiş altı guruşu bi-hükmi’l-kefâleti müdde‘î-i mezbûra edâ ve teslîme mezbûr İstavrid zimmîye tenbîh-birle mâ-vaka‘a bi’t-taleb ketb olundu. Fî 17 min-Şa‘bâni’l-mu‘azzam sene 1121 Şuhûdü’l-hâl: Ahmed Çavuş b. Yusuf, Mustafa Ağa b. Mehmed, Mustafa Çelebi b. Şa‘ban, Hasan Çelebi b. Mustafa ve gayruhum mine’l-huzzâr.