Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 537 Hüküm no: 612 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hacı Mehmed b. Abdullah’ın Minas b. Agop’ta olan alacağının kefili olan kardeşi Yoseb’in ödemesi Ekrâd tâifesinden Ali b. Hacı Mehmed b. Abdullah nâm kimesnenin li-ebeveyn karındaşı ve tarafından husûs-ı âti’z-zikre vekîl olduğu Hüseyin b. Ali ve Ali b. Mehmed şehâdetleriyle şer‘an sâbit olan zümre-i sipâhîyândan işbu bâ‘isü’l-kitâb Hüseyin Bey nâm kimesne meclis-i şer‘de Minas v. Agop nâm zimmî muvâcehesinde bi’l-vekâle üzerine da‘vâ ve takrîr-i kelâm edip müvekkilim mezbûr Ali’nin merkūm Minas’ın karındaşı gāib ani’l-meclis Yoseb v. Agop nâm zimmî zimmetinde cihet-i deyn-i şer‘îden yirmi guruş hakkı olup meblağ-ı mezbûra merkūm Minas tarafeynden emr ve kabûlü hâviye kefâlet-i sahîha-i şer‘iyye ile kefîl olmağın meblağ-ı merkūmu mezbûr Minas’dan taleb ederim suâl olunup alıverilmesi matlûbumdur dedikde gıbbe’s-suâl ve akībe’l-inkâr vekîl-i mezbûr Hüseyin Bey’den müdde‘âsını mübeyyine beyyine taleb olundukda udûl-i ricâl-i Müslimînden olup mahmiye-i mezbûrede Şehzâde kurbünde sâkin Hüseyin b. Ali ve Ali b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûrun müvekkili mezbûr Ali b. el-Hâc Mehmed b. Abdullah’ın gāib-i mezbûr Yoseb v. Agop zimmetinde cihet-i deyn-i şer‘îden olan yirmi guruş hakkına tarafeynden emr ve kabûlü hâviye kefâlet-i sahîha-i şer‘iyye ile merkūm Minas bizim huzûrumuzda kefîl olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle [olmağın] mûcebince meblağ-ı mezbûr yirmi guruş kefâlet-i mahkiyyesine binâen vekîl-i mezbûra edâ ve teslîme mezbûr Minas’a tenbîh-birle mâ-vaka‘a bi’t-taleb ketb olundu. Fî 12 min-Şa‘bâni’l-mu‘azzam sene 1121 Şuhûdü’l-hâl: Mustafa Çelebi b. Şa‘ban, Abdullah b. Abdullah, Ali b. İvaz, Ali b. Bâli, Osman b. Abdullah ve gayruhum mine’l-huzzâr.