Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 537 Hüküm no: 613 Orijinal metin no: [89b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cennet bt. Abdullah b. Abdurrahman’ın vârislerinden büyük oğlu İbrahim’in terekedeki hissesini üvey babası Ömer Beşe b. Süleyman’dan teslim aldığı Mahmiye-i İstanbul’da Yenibahçe kurbünde Hoca Hayreddin Mahallesi'nde sâkine iken bundan akdem vefât eden Cennet bt. Abdullah b. Abdurrahman nâm hatunun verâseti zevc-i metrûku Ömer Beşe b. Süleyman ile zevc-i âhardan sulbî kebîr oğlu İbrahim ve sulbiye kebîre kızı Fâtıma bt. İsmail’e münhasıra ve tashîh-i mes’elesi dört sehmden olup sihâm-ı mezbûreden bir sehmi zevci mezbûr Ömer Beşe’ye ve iki sehmi oğlu mezbûr İsmail’e ve bir sehmi kızı mezbûre Fâtıma’ya isâbet ve intikāl eylediği şer‘an zâhir ve mütehakkık oldukdan sonra mezbûr İbrahim Beşe meclis-i şer‘-i şerîf-i enverde müteveffât-ı mezbûrenin zevci işbu râfi‘u’l-kitâb mezbûr Ömer Beşe bi’l-verâse vâzı‘u’l-yed olmağla tereke-i mezbûreden tashîh-i mezbûr üzere bana isâbet eden hisse-i irsiyye-i ma‘lûmemi mezbûr Ömer Beşe bi’t-tamam def‘ ü teslîm ben dahi yedinden ahz u kabz eylediğimden sonra tereke-i müteveffât-ı mezbûreye ve sâir târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i da‘vâdan her birimiz âharın zimmetini ibrâ ve iskāt eyledik ba‘de’l-yevm birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Şa‘bâni’l-mu‘azzam sene 1121 Şuhûdü’l-hâl: Ali b. Süleyman, Müezzin Yusuf, Mustafa b. Hüseyin, Mehmed Çelebi b. Hüseyin, Mehmed b. Ahmed, Mustafa b. Şa‘ban, Ali b. İvaz, Hasan b. Mustafa, Abdullah b. Abdullah ve gayruhum mine’l-huzzâr. [Defterin 89a'sından sonra ciltleme hatası ve diğer bazı sıkıntılardan dolayı sayfalar karışmış olup yer yer atıf yapılacktır.]