Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 538 Hüküm no: 614 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esterye bt. Sabatay’ın vârislerinden Latin v. Hayim’in terekedeki hissesine karşılık Esterye’nin babası Sabatay ve ile Manovil v. Avram’la sulh olduğu Mahmiye-i İstanbul’da Katalan cemâ‘atinden Latin v. Hayim nâm Yahûdi mahfil-i kazâda Zeytun cemâ‘atinden işbu bâ‘isü’s-sifr Sabatay v. Hayim ve Manovil v. Avram nâm Yahûdiler muvâcehelerinde ikrâr-ı tâm ve takrîr-i kelâm edip mahmiye-i mezbûrede Fenerkapısı hâricinde sâkine iken bundan akdem hâlike olan Esterye bt. Sabatay nâm Yahûdiyenin verâseti babası mezbûr Sabatay’a münhasıra iken benim anamın kız karındaşı olmağla ben dahi vâris olmak zu‘muyla hâlike-i mezbûrenin nukūdundan üç yüz guruş ile sâir eşyâ-i ma‘lûmesini ahz u kabz etmişidiniz deyü mezbûrân Sabatay ve Manovil’den da‘vâ sadedinde olduğumda mezbûrân Sabatay ve Manovil kendi mâllarından teberru‘an bana on beş guruş def‘ ü teslîm ben dahi yedlerinden tamamen ahz u kabz eylediğimden sonra husûs-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika cemî‘ de‘âvî ve mutâlebât ve kâffe-i eymân ve muhâsamâtdan mezbûr Sabatay ve Manovil ve gāibûn ani’l-meclis Haham Abraham v. Aslan ve Hayim v. Mosi ve İlya v. Nesim ve cemâ‘at başılarından Yasef ve Rişvar ve David nâm Yahûdilerin zimmetlerini ibrâ-i âmm-ı kātı‘u’n-nizâ‘la ibrâ ve iskāt eyledim fîmâ-ba‘d husûs-ı mezkûra müte‘allik vechen mine’l-vücûh kat‘â da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 14 min-Şa‘bâni’l-mükerrem sene 1121 Şuhûdü’l-hâl: Hasan b. Mustafa, Veli Çavuş b. Abdullah, Osman b. Mustafa, Ali Çelebi b. Mustafa, Ali Beşe b. Bâli, Süleyman b. Abdullah ve gayruhum mine’l-huzzâr.