Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 539 Hüküm no: 615 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lütfi bt. Abdullah Hatun’un kocası Mustafa b. Mehmed’e olan mehir bedelinin büyük bir bölümünü kendisine hibe ettiği Mahmiye-i İstanbul’da Debbâğzâde el-Hâc Hasan Mahallesi'nde sâkine olup zâtı Mustafa Çelebi b. Hamza ve Ali Çelebi b. Abdurrahman nâm kimesneler ta‘rîfleriyle mu‘arrefe olan Lütfi bt. Abdullah nâm hatun meclis-i şer‘-i şerîf-i enverde zevc-i dâhili işbu sâhibü’l-kitâb Mustafa b. Mehmed nâm kimesne mahzarında ikrâr-ı tâm ve takrîr-i kelâm edip zevcim mezbûr el-Hâc Mustafa zimmetinde mütekarrer ve ma‘kūdün-aleyh olan üç bin akçe mehr-i müeccelimin iki bin dokuz yüz akçesini zevcim mezbûr el-Hâc Mustafa’ya hibe-i sahîha-i şer‘iyye ile hibe edip ve meblağ-ı mezbûr da‘vâsından zimmetini ibrâ ve iskāt eyledim fîmâ-ba‘d zevcim mezbûr Hacı Mustafa zimmetinde yüz akçe mehr-i müeccelimden gayrı hakkım bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 17 min-şehri Şa‘bâni’l-mu‘azzam sene 1121 Şuhûdü’l-hâl: Mustafa b. Mehmed, el-Hâc Ebûbekir b. Abdullah, Ali Çelebi b. İvaz, Mustafa Çelebi b. Hamza, Ali Çelebi b. Abdurrahman, Abdurrahman b. Ahmed, Abdülkerim b. Ahmed, Hasan b. Abdullah el-Muhzır, Ali Beşe b. Bâli, Ali Çelebi b. İvaz bir dahi yazılmış, Hasan b. Abdullah ve gayruhum mine’l-huzzâr.