Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 59 Hüküm no: 49 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Aci Mıgırdıç’ın varisleri arasındaki miras taksimi yüzünden çıkan anlaşmazlığın giderildiği Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkine olup zâtı vech-i şer‘î üzere mu‘arrefe olan Deniye bt. Aci Mıgırdıç nâm Nasrâniye meclis-i şer‘-i hatîrde li-ebeveyn kız karındaşı işbu râfi‘atü’r-rakīme ...? bt. Aci Mıgırdıç Nasrâniye tarafından ber-vech-i âti’l-beyanda tasdîka vekîl-i müseccel-i şer‘îsi olan zevci Serkis v. Avanis zimmî muvâcehesinde üzerine da‘vâ ve takrîr-i kelâm edüp babamız hâlik-i merkūmun hîn-i helâkinde bi’l-cümle terekesinden defter-i kassâmdan hâric ez-defter dört kese akçenin ve on beş aded ağa tahtası ve üç vakıye hıyar çekirdeği ve dört vakıye kabak çekirdeği ve otuz aded teferrüc? hasırı ve yüz aded teferrüc kazığının mevcûd ise aynlarından ve müstehleke ise kıymet-i şer‘iyesinden ve dahi vakıf toprağında Draman Ayazması kurbünde vâki‘ bir tarafı Aci Baron bağı ve bir tarafı Tavşanbağı ve bir tarafı İsayî bostanı ve bir tarafı tarîk-i âm ile mahdûd tahmînen üç dönüm bir kuyulu vişne eşcârlı bahçenin nısfı babamdan müntakil ve nısf-ı âharını kız karındaşım mesfûreden otuz guruşa iştirâ eylediğim nısfını ve dahi kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb kebîr menzili bi-cümleti’t-tevâbi‘ babam hâlik-i merkūm hîn-i helâkinden üç sene mukaddem hibe ve teslîm eylemişdi lâkin hîn-i helâkinde defter-i kassâma idhâl ve beyne’l-verese tevzî‘ ve taksîm olunup karındaşım müvekkile-i mesfûreden taleb ederim suâl olunup ber-vech-i muharrer alıverilmesi matlûbumdur dedikde gıbbe’s-suâl mezbûr Serkis vekâleten cevâbında tereke-i hâlik-i merkūmun cemî‘ metrûkâtı ba‘de’t-tahrîr ve’t-taksîm ber-mûceb-i defter-i kassâm mesfûre Deniye’nin hisse-i ırsiye-i şer‘iyesine isâbet ve intikāl eden bir yük otuz iki bin dört yüz altmış üç akçe hakkı mukābelesinde vakıf toprağında Draman Ayazması kurbünde vâki‘ lede’l-ahâlî ve’l-cîrân ma‘lûmü’l-hudûd altı dönüm bir kıt‘a dut bağını ve mahâll-i mezkûrda vâki‘ beş dönüm bir kıt‘a çavuş bağını ve yine Maldepe toprağında vâki‘ on beş dönüm bir kıt‘a dut ve çavuş ve Altuntaş bağının ve yine mezkûr Ayazma kurbünde vâki‘ dört dönüm bir kıt‘a vişne bahçesinin ve yine Maldepe toprağında vâki‘ dört dönüm bir kıt‘a harâb dut bağının ve yine kasaba-i mezbûrede vâki‘ bir bâb kebîr menzilin nısflarını ve sâir eşyânın dahi nısflarını târîh-i mezkûrdan bir buçuk sene mukaddem bi’t-terâzî hissesi içün ta‘yîn ü tahsîs ve kabûl ü teslîm edüp husûs-ı mîrâsa ve dâhil-i defter ve hâric ez-defter tereke-i hâlik-i merkūma müte‘allıka âmme-i da‘vâdan ehadühümâ âharın zimmetini ibrâ ve iskā[t] eylediler dedikde ol dahi ber-vech-i muharrer ibrâ-i mezkûru inkâr edicek müvekkil-i mesfûrdan def‘-i mîrâsına mutâbık beyyine taleb olundukda ahrâr-ı [r]icâl-i Nasârâdan beynlerinde müstakīm Angeli v. Karabet ve Ohan v. Marat ve İstasodor v. Sahak ve Nikogos v. Aci Bogos zimmîler li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka işbu müdde‘iye-i mesfûre Deniye bt. Aci Mıgırdıç Nasrâniye târîh-i mezkûrdan bir buçuk sene mukaddem bâlâda mezkûr altı kıt‘a bağların ve bir kıt‘a vişne bahçesinin ve bir bâb menzilin nısflarını ve sâir eşyânın nısfını bir yük otuz iki bin dört yüz altmış üç akçe hakkı mukābelesinde bi’t-terâzî hissesi içün ta‘yîn ve tahsîs ve teslîm eyleyüp husûs-ı mîrâsa ve dâhil-i defter ve hâric ez-defter tereke-i hâlik-i merkūma müte‘allıka âmme-i da‘vâdan ehadühümâ âharın zimmetini ibrâ-i âm ile ibrâ ve iskāt eylediler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mesfûre Deniye dahi ber-vech-i muharrer ibrâ-i mezkûru bi-tav‘ihâ ikrâr etmeğin mûcebince bî-vech mu‘ârazadan men‘ birle mâ-hüve’l-vâki‘ bi’t-taleb ketb olundu. Fî 6 Cemâziyelâhir sene [1]179 Şuhûdü’l-hâl: Voyvoda Süleyman Ağa, Nalband İbrahim Beşe, Kalyoncu Mehmed, İshakoğlu Mehmed, Müezzin Molla Mustafa, Ahmed Efendi, Kara Ahmed b. Mehmed Molla Ali b. Yahya, Vefa b. Mehmed. Yazıcı Kirkor ve Aci Kevork, İstefani.