Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 547 Hüküm no: 623 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova’nın vefât eden Manol Reis v. Tato v. Kostantin’in oğlu olduğu iddiasıyla Manol’un vârislerine açtığı davadan vazgeçtiği El-emru kemâ-zükire fîhi nemekahü’l-fakīr ileyhe sübhânehû Es-Seyyid Mehmed el-Kādı bi-medîne-i Kostantıniyyeti’l-mahmiye Ufiye anhü Mahmiye-i İstanbul’da Fenerkapısı dâhilinde Abdi Subaşı Mahallesi'nde sâkin Praşkova nâm zimmî meclis-i şer‘-i hatîr-i lâzımü’t-tevkīrde yine mahalle-i mezbûreden zikr olunan Fenerkapısı hâricinde sâkin iken bundan akdem hâlik olan Manol Reis v. Tato v. Kostantin nâm zimmînin vârisleri idiği lede’ş-şer‘i’l-enver zâhir ve müte‘ayyin olan ashâb-ı hâze’l-vesîka zevcesi Eskeline bt. Marza ile sulbiye kebîre kızı Tarsiye ile li-ebeveyn er karındaşı oğlu Palolo v. Zakarya nâm zimmî muvâcehelerinde ikrâr-ı tâm ve takrîr-i kelâm edip ben hâlik-i mezbûr Manol Reis’in firâşından hâsıl ve câriyesi Eline nâm Nasrâniyeden mütevellid sulbî oğlu olup hattâ hâlik-i mezbûr Manol Reis benim için firâşımdan hâsıl ve ümm-i veledim mezbûre Eline’den mütevellid oğlumdur deyü şuhûd mahzarında ikrâr ve bu vech üzere da‘vâ-yı neseb edip hâlik-i mezbûrun verâseti mezbûretân Eskeline ve Tarsiye ile bana münhasıradır ve tereke-i hâlik-i mezbûrda hissem vardır deyü bi’l-verâse vâzı‘u’l-yed olan mezbûrûndan taleb ve da‘vâ sadedinde olmuşidim mezbûr Manol Reis câriyesi mezbûre Eline’yi ba‘de’l-i‘tâk zikri mürûr eden Fenerkapısı hâricinde Abdi Subaşı Mahallesi'nde sâkin iken hâlik olan Doğramacı Yanaki v. Aslan nâm zimmîye hayâtlarında inkâh ve tezvîc ol dahi tezevvüc ve kabûl etmekle ben hâlik-i sânî-i mezbûr Doğramacı Yanaki zimmînin firâşından hâsıl ve zevcesi mezbûre Eline’den mütevellid oğlu olup vech-i meşrûh üzere ben hâlik-i evvel-i mezbûr Manol Reis’in oğluyum deyü eylediğim da‘vâmda mübtil olmağla da‘vâ-yı mezkûremden fâriğ olup husûs-ı mezbûra ve hâlik-i evvel-i mezbûr Manol Reis’in kalîl ü kesîr celîl ü hakīr nukūd ve menkūl ve akār bi’l-cümle ism-i mâl ıtlâk olunur terekesine ve târih-i kitâba gelince verese-i mezbûrûn ile hâlik-i mezbûr Manol Reis’in âhar li-ebeveyn er karındaşı oğlu gāib ani’l-meclis Pelaş v. Pelaş ile sâir beynimizde cereyân eden ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan ben verese-i mezbûrûn Eskeline ve Tarsiye ve Palolo ve Pelaş’ın zimmetlerini ibrâ-i âm ile ibrâ ve iskāt [eyledim] dedikde gıbbe’-tasâddukı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe sene 1120 Şuhûdü’l-hâl: Mehmed Çelebi b. Receb, Osman Çavuş b. Mehmed el-Mübâşir, el-Hâc Ebûbekir b. Mehmed Yeniçarşı’dan, Mustafa Çelebi b. Ömer, Abdi Ağa b. İbrahim, Siyavuş Beşe b. Abdullah Çukadâr, es-Seyyid Süleyman Çelebi b. Halil, Osman b. Hasan, Mehmed b. İbrahim, Ali b. Murtaza, Ahmed Çelebi b. Mehmed, Ali b. İvaz ve gayruhum mine’l-huzzâr.