Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 549 Hüküm no: 624 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanköy’de padişaha limon suyu tedârikiyle bulunan görevlilerin ihtiyaçları için Unkapanı’ndan 250 keyl buğdayın adaya nakline engel olunmamasına dâir Boğazhisarları dizdarlarına hüküm Mefâhirü’s-sikāt ve’l-müstahfızîn Boğazhisarları dizdârları zîde hıfzuhüm tevkī‘-i refî‘-i hümâyûnum vâsıl olıcak ma‘lûm ola ki hâssa helvacıbaşı olan kıdvetü’l-emâcid ve’l-a‘yân Hasan zîde mecdühû Südde-i sa‘âdetime arzuhâl edip İstanköy cezîresinde nefs-i nefîs-i hümâyûnum için limon suyu ihrâcına memûr olan helvacı neferâtının ve işçilerinin kifâf-ı nefsleri'çün beher sene Âsitâne-i sa‘âdet’imde Kapan-ı dakīk’den iki yüz ellişer keyl hınta verilegelmekle işbu sene-i mübârekede dahi verilip mürûruna mümâna‘at olunmamak bâbında hükm-i hümâyûnum ricâ ve taraf-ı Devlet-i aliyye’den âb-ı limon ihrâcına memûr olup İstanköy cânibine gidenlere zahîre olmak üzere sene-i sâbıkāda bâ-fermân-ı âlî iki yüz elli keyl hınta verildiği kapan defterinde mastûr ve mukayyed bulunduğun kıdvetü’n-nüvvâbi’l-müteşerri‘în Kapan-ı dakīk nâibi olan Mevlânâ Abdurrahman zîde ilmuhû i‘lâm etmeğin mevlânâ-yı mûmâ-ileyhin i‘lâmı mûcebince iki yüz elli keyl hıntanın nakline mümâna‘at olunmamak emrim olmuşdur buyurdum ki hükm-i şerîfimle vusûl buldukda bu bâbda sâdır olan emrim üzere amel dahi mevlânâ-yı mûmâ-ileyhin i‘lâmı mûcebince vech-i meşrûh üzere İstanköy cezîresinde mezkûrlara zahîre olmak üzere yalnız iki yüz elli keyl hıntanın cezîre-i mezbûreye nakline ve Boğazhisarlarında mürûruna mümâna‘at olunmayıp emr-i şerîfimin mazmûn-ı münîfi ile âmil olasız şöyle bilesiz alâmet-i şerîfe i‘timâd kılasız. Tahrîren Fî-evâsıtı şehri Rebî‘ülâhir sene 1121 Be-makām-ı Kostantıniyyeti’l-mahrûse