Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 549 Hüküm no: 625 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Sebzeciler Kethüdalığı’na Dergâh-ı muallâ cebecilerinden Bekir’in tayin edildiği Nişan-ı şerîf-i âlî-şân-ı sâmî-mekân-ı sultânî ve tuğra-yı garrâ-yı cihân-sitân-ı hâkānî hükmü oldur ki Dergâh-ı mu‘âlla’m cebecilerinden ikinci cemâ‘atde yevmî on beş akçe ulûfeye mutasarrıf olan işbu râfi‘u tevkī‘-i refî‘u’ş-şân-ı hâkānî kıdvetü’l-emâsil ve’l-akrân Bekir zîde kadrühu Dîvân-ı hümâyûn’uma arzuhâl sunup mahall ü müstehak olmağla mutasarrıf olduğu ulûfesini hazîne-mânde ve mukābelesinde İstanbul’da Sebzeciler Kethüdâlığı kendiye tevcîh olunup berât-ı şerîfim verilmek bâbında inâyet ricâ etmeğin hakkında mezîd-i inâyet-i pâdişâhânem zuhûre getirip kendi arzuhâli ve bin yüz yirmi bir Cemâziyelâhir’inin on birinci günü târihiyle müverrah verilen ruûs-ı hümâyûnum mûcebince mutasarrıf olduğu yevmî on beş akçe ulûfesi hazîne-mânde ve mukābelesinde İstanbul’un sebzeciler kethüdâlığın tevcîh edip bu berât-ı hümâyûn-ı sa‘âdet-makrûnu verdim ve buyurdum ki mezbûr Bekir zîde kadrühu varıp hazîne-mânde eylediği ulûfesi mukābelesinde sebzeciler kethüdâsı olup hizmet-i lâzımesin kemâ-yenbagī mer‘î ve müeddî kıldıkdan sonra bundan akdem kethüdâ olanlar ne minvâl üzere mutasarrıf olagelmişler ise mezbûr Bekir zîde kadrühu dahi ol minvâl üzere mutasarrıf ola ol bâbda taraf-ı âhardan hiç mâni‘ ve müzâhim olmayıp dahl ü ta‘arruz kılmaya şöyle bileler alâmet-i şerîfe i‘timâd kılalar. Tahrîren fi’l-yevmi’l-ışrîn min-Cumâdelâhire sene 1121 Be-makām-ı Kostantıniyyeti’l-mahrûse Vasale ileynâ fî-23 min-Cumâdelâhire sene 1121