Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 550 Hüküm no: 626 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa Vakfı ile Ali Çavuş Vakfı’na ait arsa ve binanın Vezir Ali Paşa’nın mülk olan bina ve arsasıyla tebdil edilmesine dair İstanbul kadısına hüküm Adzâ kudâti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘u i‘lâmi’ş-şerî‘ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în Mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki sen ki mevlânâ-yı mûmâ-ileyhsin Südde-i sa‘âdetime mektûb gönderip mahmiye-i İstanbul’da vâki‘ Hüseyin Ağa Vakfı’nın mütevellîsi olan Hüseyin b. Hasan ve Ali Çavuş Vakfı’nın mütevelliyesi olan Emine bt. el-Hâc Yusuf nâm hatun meclis-i şer‘-i şerîfe varıp mezbûr Hüseyin Ağa Mahallesi'nde vâki‘ ma‘lûmetü’l-hudûd vakıf menzilin arsa ve ebniyesini düstûr-ı ekrem müşîr-i mufahham nizâmü’l-âlem nâzımü menâzımü’l-ümem hâlâ Vezîriazâm Ali Paşa edâmallâhu te‘âlâ iclâlehunun Mahmud Paşa Mahallesi'nde vâki‘ ma‘lûmetü’l-hudûd mülk menzilin arsasıyla mezbûr Hüseyin Ağa Vakfı arsasını ve mülk ebniyesini dahi arsa-yı mevkūfe-i mezbûre üzerinde mebnî olup mezkûr Ali Çavuş vakfı olan ebniyesiyle istibdâl murâd ettiklerinde izn-i şer‘le ser-mi‘mârân-ı hâssa olan kıdvetü’l-emâcid ve’l-a‘yân Mehmed b. Halil zîde mecdühû ve diğer Mehmed b. Mustafa ve Mehmed b. Ali ve sâir vukūfu olan Müslimîn ile üzerlerine varıp keşf ve mesâha olundukda vakıf olan menzilin dört yüz zirâ‘ arsasının zirâ‘ı yüz ellişer akçeden altmış bin akçe ve arsa ve ebniyesinin ecr-i misli yevmî on akçe olup ve üzerinde mebnî Ali Çavuş Vakfı’ndan olan nıkz hükmünde köhne ebniyenin kıymet-i misliyyesi on altı bin dört yüz seksen akçeye bâliğ olduğu yedinde olan hüccet nâtıka olmağla bi-ecmâ‘ihim mülk olan menzil-i mezkûra varıp keşf ve mesâha olundukda hâriciye ve dâhiliyenin binâlı ve binâsız bi-hesâb-ı terbî‘î dört yüz on sekiz zirâ‘ arsanın zirâ‘ı üçer yüz akçeden bir yük yirmi beş bin dört yüz akçe ve hâriciye ve dâhiliyede üç kat büyût-ı adîdeyi müştemil bi-hesâb-ı terbî‘î üç yüz otuz altı zirâ‘ arsa üzerinde mebniye olan ebniye-i memlûkenin zirâ‘ı ikişer yüz ellişer akçeden bir yük yirmi sekiz bin yüz akçe ve kârgîr demir kapıyı terbî‘î yirmi dört zirâ‘ mahzenin zirâ‘ı üçer yüz yirmişer akçeden yedi bin altı yüz seksen akçe ve arsa ve ebniyenin ecr-i misli yevmî yirmi akçeye bâliğ olduğu nümâyân olmağın bu takdîrce şürût-ı istibdâl min-külli’l-vücûh mevcûde ve mütehakkıka olup vakf-ı mezbûra istibdâl enfa‘ ve ahrâ olmağla arsa-yı mevkūfe-i mezbûreyi arsa-yı memlûke ile ve ebniye-i mevkūfe-i mezbûreyi arsa-yı memlûke ile ve ebniye-i mevkūfe-i mersûmeyi dahi ebniye-i memlûke-i mezkûre ile istibdâl olunmak bâbında hükm-i hümâyûnum verilmek ricâsına arz eylediğin ecilden vech-i meşrûh üzere istibdâl olunmak emrim olmuşdur buyurdum ki hükm-i şerîfimle vusûl buldukda bu bâbda sâdır olan emrim üzere amel dahi husûs-ı mezbûra tamam mukayyed olup göresin mülk olan arsa ve ebniye rey‘ ve rağbet ve kıymet ve ücret cihetlerinden vakıf olan arsa ve ebniyeden ezyed ve evfer olup şerâit-i istibdâl bi-tamâmihâ yerin bulmuş ise istibdâli tecvîz eyleyen fukahâ-yı zevi’l-ihtirâmın kavilleri üzere mülk olan arsa ve ebniye vakıf ve vakıf olan arsa ve ebniye mülk olup vakf-ı ûlânın şürûtu vakf-ı sânîde icrâ olunmak üzere istibdâl eyleyip tarafeyne hüccet veresin şöyle bilesin alâmet-i şerîfe i‘timâd kılasın. Tahrîren fî-evâsıtı şehri Receb li-sene ihdâ ve işrîn ve mie ve elf Be-makām-ı Kostantıniyyeti’l-mahrûse Kad vasale ileynâ fi’l-yevmi’r-râbi‘ aşer min-Recebi’l-mürecceb sene 1121