Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 560 Hüküm no: 635 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veziriazâm Ali Paşa vakfından Azebkapısı’ndaki şem‘hânesinin gedikli şem‘hâneler defterine kaydının yapılarak buraya da diğer işletmelere verildiği gibi yağ mumu verilmesi Akdâ kudâti’l-Müslimîn evlâ vülâti’l-muvahhidîn ma‘deniyü’l-fezâiyil ve’l-yakīn râfi‘ayi i‘lâmi’ş-şerî‘ati ve’d-dîn vârisiyyi ulûmi’l-enbiyâi ve’l-mürselîn el-muhtassiyyi bi-mezîd-i inâyeti’l-Meliki’l-Mu‘în İstanbul ve Galata kādıları zîdet fezâiluhûmâ tevkī‘-i refî‘-i hümâyûn vâsıl olıcak ma‘lûm ola ki düstûr-ı ekrem müşîr-i mufahham nizâmü’l-âlem nâzımü menâzımü’l-ümem Vezîriazâmım Ali Paşa edâmallâhu te‘âlâ iclâlehunun Tersâne-i âmire’mde ve mahmiye-i İstanbul’da Hüseyin Ağa Mahallesi’nde müceddeden binâ ve ihyâ eyledikleri câmi‘-i şerîfleri ve medrese-i münîfe ve tekye-i latîfe ve imâret-i ma‘mûreleri evkāfı musakkafâtından mahmiye-i Galata’da Azabkapısı’nda Meyyit İskelesi’nde olan şem‘hâneleri gedikli şem‘hâne defterine kaydolunmamağla şem‘-i revgan gedikli şem‘hânelere tevzî‘ olundukda müşârun-ileyhin şem‘hânesinde olan müstecirlere sizin şem‘hânenizin gedikli defterinde kaydı yokdur deyü sâir gedikli şem‘hânelere tevzî‘ olunan şem‘-i revgandan hisse verilmeyip gadr olunduğu i‘lâm olunmağla siz ki mevlânâ-yı mûmâ-ileyhsiz müşârun-ileyhin şem‘hânesini dahi müceddeden gedikli defterine kayd ve revgandan şem‘ tevzî‘ olundukda sâir şem‘hânelere verildiği minvâl üzere müşârun-ileyhin şem‘hânesine dahi hisse verilip bir ferde mu‘âraza ve muhâlefet ettirilmemek bâbında fermân-ı âlî-şânım sâdır olmuşdur buyurdum ki hükm-i şerîfimle vusûl buldukda bu bâbda sâdır olan fermân-ı celîlü’l-kadrim mûcebince amel edip dahi siz ki mevlânâ-yı mûmâ-ileyhsiz müşârun-ileyhin şem‘hânesini dahi müceddeden gedikli defterine kayd ve revgandan şem‘ tevzî‘ olundukda sâir şem‘hânelere verildiği minvâl üzere müşârun-ileyhin şem‘hânesine dahi hisse verilip bir ferde mu‘âraza ve muhâlefet ettirmeyip emr-i şerîfimin mazmûn-ı münîfi ile âmil olasız şöyle bilesiz alâmet-i şerîfe i‘timâd kılasız. Tahrîren Fî-evâili şehri Rebî‘ilevvel li-sene ihdâ ve işrîn ve mi'ete ve elf. Be-makām-ı Kostantıniyye el-mahrûse