Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 561 Hüküm no: 636 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Selim Hân evkafından Varna mukataası mahsulünün kefilleri alınan kaptanların gemileriyle Varna’dan alınıp Sakız, Kuşadası ve Karabağlar’a nakillerine izin verildiği İstanbul kādısı fazîletlü efendi zikr olunan reislerin gemiciler kethüdâsı ma‘rifetiyle zikr olunan hıntayı tahmîl ve İstanbul’a getirmek ve ba‘dehû izin oldukda mezkûr olan adalara nakl eylemek üzere mu‘ayyen yarar kefîllerin alıp i‘lâm eyleyesin deyü buyruldu. Fî 8 R sene 1121 Ma‘rûz-ı devlet-i aliyyeleridir ki merhûm Sultan Selim Hân evkāfı mukāta‘alarından Varna mukāta‘ası mahsûlünden olup yine mârru’z--zikr Varna’da mevcûd olan on beş bin keyl hıntayı sefîne reislerinden el-Hâc Hasan b. Abdullah ve Mehmed Reis b. Mehmed ve Ahmed Reis b. el-Hâc Ömer nâm kimesneler sefînelerine tahmîl ve doğru İstanbul’a getirip yine izin aldıkdan sonra Sakız adası ve Kuşadası ve Karabağlar nâm mahallere îsâl ve teslîm edip ve teslîmlerine kādılarından hüccet-i şer‘iyye getirip tescîl ettirmek şartıyla Tophâne’de Firuz Ağa Mahallesi'nde sâkin ve hâlâ Gemiciler kethüdâsı el-Hâc Mahmud b. el-Hâc Ramazan ve tüccârdan olup İstanbul’da Molla Zeyrek Mahallesi'nde sâkin el-Hâc Ahmed b. el-Hâc Yusuf nâm kimesneler meclis-i şer‘de kefîl olup vech-i muharrer üzere kefâletleri tescîl ve i‘lâm-ı hâk-i pâyları kılındı bâkī fermân men-lehü’l-emr hazretlerinindir. Fî 9 R sene 1121 Sahîhdir İ‘lâmı mûcebince mahall-i merkūmlara nakl ve hüccet-i şer‘iyye getirmek üzere nakline mümâna‘at olunmaya deyü dîvândan …? buyruldu. Fî 12 Ca sene [1]121 [Şerh:] Yine mültezim-i vakf-ı mezbûr imzâsıyla olan derkenâr ve fermân-ı âlî tebdîli iktizâ ettiği cihetle tebdîl olundukda aşağı tarafına hurde kalem ile arzuhâli derkenârı ve fermân-ı âlî kaydolunup bu mahalle ma‘lûm olmağiçün şerh verildi. Devletlü ve sa‘âdetlü ve merhametlü sultanım hazretleri sağ olsun İstanbul[‘da] vâki‘ merhûm ve mağfûrun-leh Sultan Selim Hân-ı kadîm serâhun evkāfı mukāta‘alarından Varna mukāta‘ası mahsûlünden olmak üzere on beş bin keyl hınta sefînelere tahmîl ve Sakız ve Kuşadası’nda ve Karabağlar’da fürûht olunup kādılardan arz ve hüccet-i şer‘iyye ve a‘yân-ı vilâyetden mahzar getirmek üzere ve reislerin bu tarafda İstanbul kādısı efendi ma‘rifet-i şer‘le yarar kefîlleri alınıp i‘lâm olundukdan sonra mürûruna mümâna‘at olunmamak bâbında fermân-ı şerîfleri ricâ olunur bâkī fermân devletlü efendimindir. Bende Mustafa Mültezim-i vakf-ı mezbûr