Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 80 Hüküm no: 16 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Nikola’nın vasisi olan Hristo v. Petko’nun Yadudi Mosi v. İsak üzerine açtığı davasını delillendiremediği Bilâ-beyyine mu‘ârazadan men‘. Havâss-ı Refî‘a kazâsına tâbi‘ kasaba-i Hasköy ahâlîsinden olup mecnûn olmağla bundan akdem Süleymâniye dârü’ş-şifâsına vaz‘ olunan Yorgi v. Nikola v. Yorgi nâm zimmînin karındaşı ve li-ecli’d-da‘vâ kıbel-i şer‘-i enverden vasî nasb olunan Hristo v. Petko nâm zimmî meclis-i şer‘-i hatîr-i lâzımü’t-tevkīrde Yahud tâifesinin sığır kasablarından bâ‘isü’s-sifr Mosi v. İsak nâm Yahûdi muvâcehesinde üzerine da‘vâ ve takrîr-i kelâm edip karındaşım mecnûn-ı merkūm mezbûr Mosi’nin eciri olmağla târih-i kitâbdan beş ay mukaddem Hasköy kurbünde vâki‘ Yahud kasablarının tokat tâ‘bir olunur çiftliklerinde kuşluk vaktinde karındaşım merkūm uyur iken mezbûr Mosi başının sağ tarafına çoban deyneği ile ve ayağına depme ile bi-gayr-ı hakkın amden ve kasden darb etmekle mezbûrun darbından nâşî karındaşım merkūmun ol anda aklı başından gidip târih-i mezkûrdan berü mecnûn olmağla suâl olunup mûceb-i şer‘îsi icrâ olunmak bi’l-vesâye [4a] matlûbumdur dedikde gıbbe’s-suâl ve akībe’l-inkâr vasiyy-i mezbûrdan müdde‘âsını mübeyyine beyyine taleb olundukda ityân-ı beyyine için istimhâl etmeğin kirâren ve mirâren mehl-i şer‘î-birle ba‘de’l-imhâl müddet-i mehl tamam olup ikāmet-i beyyine edemeyip yemîn dahi vermemekle vasiyy-i mezbûr Hristo merkūm Mosi’ye bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 15 min-Safer sene 1143. Şuhûdü’l-hâl: Mehmed Çelebi b. Abdullah, Kādızâde Mustafa b. İbrahim, Ya‘kub b. Abdullah, Duhânî Mehmed b. ( ).