Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 81 Hüküm no: 17 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mehmed b. Hüseyin’in boşandığı eşi Ayşe bt. Mustafa’dan olan oğlu Hüseyin’e nafaka bağlanması Nafaka. Mahmiye-i İstanbul’da Sinanpaşa Mahallesi sâkinelerinden olup zâtı İbrahim Çelebi b. Mustafa ve Ahmed Çelebi b. Hasan nâm kimesneler ta‘rîfleriyle mu‘arrefe olan işbu bâ‘isetü’l-vesîka Âişe bt. Mustafa nâm hatun meclis-i şer‘-i şerîf-i enverde zevc-i sâbıkı Molla Mehmed b. Hüseyin nâm kimesne mahzarında takrîr-i kelâm ve tâ‘bir ani’l-merâm edip mezbûr Molla Mehmed zevcim olup beni bâyinen tatlîk etmekle mezbûrun firâşından hâsıl ve benden mütevellid bi-hakkı’l-hıdâne hacr [ve] terbiyemde olan sadrî sagīr oğlum Hüseyin’in nafaka ve kisvesi’çün babası mezbûr üzerine kıbel-i şer‘den kadr-i ma‘rûf akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûrun nafaka ve kisvesi’çün mezbûr Molla Mehmed üzerine bi’t-terâzî târih-i kitâbdan beher yevm ikişer para nafaka farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer mezbûr Molla Mehmed üzerine rücû‘a mezbûre Âişe Hatun’a izin verilmeğin mâ-vaka‘a bi’t-taleb ketb olundu. Fî 21 min-Safer sene 1143. Şuhûdü’l-hâl: Mehmed Çelebi b. Abdullah, İbrahim Çelebi b. Hasan, Mustafa Çelebi b. Ramazan, el-Hâc Tatar b. Ali, Ahmed Çelebi b. Hasan, Abdullah Çelebi b. Mustafa.