Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 82 Hüküm no: 18 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın Numan Efendi b. Salih b. Mehmed’in vârisleri ile anlaştığı Ahz u kabz. Anadoluhisarı kurbünde Kanlıcak nâm karye ahâlîsinden olup bundan akdem vefât eden Numan Efendi b. Salih b. Mehmed’in verâseti zevce-i metrûkesi Ümmügülsüm bt. Mehmed ve sulbiye sagīre kızı Hanife’ye ve li-eb kız karındaşı Hadice’ye ve vâlidesi Arzu nâm hatuna münhasıra oldukdan sonra müteveffâ-i mezbûrun mu‘taka ve müdebberesi ve zâtı zevci Mehmed Çelebi b. el-Hâc Mehmed ve Duhânî Halil b. Hüseyin nâm kimesneler ta‘rîfleriyle mu‘arrefe olan Zeyneb bt. Abdullah nâm hatun meclis-i şer‘-i şerîf-i enverde râfi‘atü’l-vesîka mezbûre Arzu mahzarında ikrâr ve takrîr-i kelâm edip mezbûr Numan Efendi hayâtında fevtinden mukaddem bana hitâb edip bi-emri’llâhi te‘âlâ vefât ettiğimde terekemin sülüsünden on aded kadife yastık ve altı aded minder ve üç aded atlas mak‘ad ve bir orta keçesi ve nakd iki yüz guruşu sen ahz u kabz eyle deyü vasiyyet ve musırran vefât etmekle terekesinin sülüsünü vesâyâsına müsâ‘ide iken mezbûr Arzu ve merkūme Hadice ve sagīre-i mezbûrenin vasiyy-i muhtâresi vâlidesi mezbûr Ümmügülsüm bt. Mehmed nâm hatunlar merhûm-ı mezbûrun vesâyâ-yı mezkûresini tenfîzden imtinâ‘ ederler şer‘iyyâtî Derviş Mustafa Efendi huzûrunda murâfa‘a ve müdde‘âmı vech-i şer‘î üzere isbât ve hükmolunmuş idi hâlâ meblağ-ı mahkûmun-bihden mezbûre Arzu Hatun bana yüz elli guruş def‘ ve teslîm etmekle ben dahi yedinden ahz u kabz edip ziyâde yüz guruş ile eşyâ-i muharrere-i mezkûre mütâlebesinden ben mezbûre Arzu ve mezbûre Hadice ve sagīre Hanife ve Ümmügülsüm nâm hatunları ibrâ-i âmm-ı râfi‘u’l-hısâm ile ibrâ ve iskāt eylediğimde mezbûre Arzu dahi âmme-i da‘vâdan târih-i kitâba gelince benim zimmetimi ibrâ-i âmm-ı râfi‘u’l-hısâm ile ibrâ ve iskāt eyledi. Fîmâ-ba‘d birbirimiz ile vechen mine’l-vücûh da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Safer sene [1]143. Şuhûdü’l-hâl: Mehmed Efendi b. Hüseyin, Abdullah Efendi b. Ahmed Efendi, Kādızâde İbrahim b. Mustafa, Mustafa b. Ahmed, Molla Ali b. Mustafa, Molla Ahmed b. İbrahim, Ahmed b. Şa‘ban.