Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 88 Hüküm no: 25 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Kiragos ile Karabet v. Markir’in aralarındaki alacak davasında sulh oldukları Tüccâr tâifesinden olup mahmiye-i İstanbul’da Kebeciler Hanı’nda müsâfiren sâkin Bedros v. Kiragos nâm zimmî meclis-i şer‘-i şerîf-i enverde işbu râfi‘u’s-sifr Karabet v. Markir nâm zimmî muvâcehesinde ikrâr ve takrîr-i kelâm edip mezbûr Karabet ile şirket beynimizde kāime iken medîne-i İzmir’den bi’d-defa‘ât yirmi sekiz bin zirâ‘ çuka irsâl eylediğimde ol dahi ba‘de’l-kabz âhara bey‘ ve asl-ı mâlı bana îsâl ben dahi ahz u kabz etmişidim lâkin hâsıl olan fâidesinden benim hissem için isâbet eden seksen guruş zimmetinde kalmışidi deyü taleb ve da‘vâya tasaddî etmişidim el-hâletü hâzihî beynimize muslihûn tavassut edip da‘vâ-yı mezbûremden beni mesfûr Karabet ile on guruş üzerine sulh eylediklerinde ben dahi sulh-ı mezbûru kabûl ve bedel-i sulh-ı mezbûru mesfûr Karabet yedinden tamamen ahz u kabz edip husûs-ı mezbûra ve sâire müte‘allika âmme-i da‘vâdan mesfûr Karabet’in zimmetini ibrâ-i âm ile ibrâ ve iskāt eyledim. Fîmâ-ba‘d husûs-ı mezbûra müte‘allika vechen mine’l-vücûh kat‘â da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Safer sene [1]143. Şuhûdü’l-hâl: Mehmed Çelebi b. Abdullah, Abdullah b. Mustafa, İbrahim b. Mustafa, Mehmed b. Ahmed, Mustafa b. Mehmed.