Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 92 Hüküm no: 31 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Nurullah’ın Mimar Ayas Mahallesi’ndeki ev hissesini Mehmed Kemaleddin Efendi’ye sattığı Mübâ‘ya‘a Husûs-ı âti’l-beyânın mahallinde ketb ü tahrîri için savb-ı şer‘-i enverden bi’t-taleb irsâl olunan Mehmed Efendi b. Nurullah mahmiye-i İstanbul’da Kırk çeşme kurbünde Mi‘mâr Ayas Mahallesi’nde vâki‘ Hadice bt. Abdullah’ın sâkine olduğu menzile varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i nebevî ettikde zâtı el-Hâc İsmail b. Abdullah ve Süleyman Efendi b. Osman ta‘rîfleriyle mu‘arrefe olan mezbûre Hadice Hatun meclis-i ma‘kūd-ı mezkûrda fahrü’l-müderrisîni’l-kirâm Mehmed Kemaleddin Efendi b. el-müvellâ el-merhûm el-mağfûr Sunullah Efendi mahzarında ikrâr ve takrîr-i kelâm edip akd-i âti’z-zikrin sudûruna değin üç sehm i‘tibârı ile bir sehm-i şâyi‘i Muammere nâm hatun mülkü ve bir sehm-i şâyi‘-i âharı mûmâ-ileyh Mehmed Kemaleddin Efendi mülkü ve bir sehm-i şâyi‘-i âharı dahi benim mülk ve hakkım olup mahalle-i mezbûrede vâki‘ bir tarafdan es-Seyyid Mehmed nâm kimesne veresesi menzili ve bir tarafdan Sahaf Mehmed Efendi menzili ve bir tarafdan Abdülbâki Efendi veresesi menzili ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda [7a] ve bir sofa ve bir bi’r-i mâ ve eşcâr-ı müsmire ve gayr-ı müsmireli bahçeyi müştemil mülk menzinden ber-vech-i muharrer mâlike olduğum bir sehm-i şâyi‘amı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Kemaleddin Efendi’ye yüz guruşa bey‘ ve temlîk eylediğimde onlar dahi iştirâ ve temellük ve kabûl eylediklerinden sonra semeni olan meblağ-ı mezbûr yüz guruşu mütâlebesinden mûmâ-ileyh Kemaleddin Efendi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim. Fîmâ-ba‘d menzil-i mahdûd-ı mezkûrda olan bir sehm-i şâyi‘am mûmâ-ileyh Kemaleddin Efendi’nin mülk-i müşterâsı olup benim kat‘â alâka ve medhalim kalmamışdır dedikde gıbbe’t-tasdîkı’ş-şer‘î vâki‘ hâli mezbûr Mehmed Efendi mahallinde ketb ü tahrîr edip ba‘dehû ma‘an ba‘s olunan Mehmed b. Ali ve Ömer b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 25 Safer sene [1]143. Şuhûdü’l-hâl: İbrahim Ağa b. Ali Efendi, Rüstem Ağa b. Abdullah, İmâm Mehmed Efendi b. Mahmud, Molla Hüseyin b. Muslu, Mustafa Ağa b. Salih, Halil Ağa b. Abdullah, el-Hâc İsmail b. Abdullah.