Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 93 Hüküm no: 33 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Markas’ın amcasını öldürdüğü iddiasıyla Toros v. Sefer üzerine açtığı davadan men olunduğu Mahmiye-i İstanbul’da İncirli hânda sâkin iken bundan akdem cerîhan hâlik olan Serkis v. Safar v. Kaşdik zimmînin karındaşı oğlu Avanis v. Markas nâm zimmî meclis-i şer‘-i şerîf-i enverde hâlik-i merkūm Serkis’in hayâtında cerh-i mezkûra ve mâ-yehdesü anha müte‘allika âmme-i da‘vâdan yedinde ibrâ hücceti olan râfi‘-i hâze’s-sifr Toros v. Sefer nâm zimmî muvâcehesinde merkūm Toros ammim-i mezbûru sağ kolu bâzûsu üzerinden pinyâl ile bi-gayr-ı hakkın darb ve cerh ve ondan nâşî otuz beş gün esîr-i firâş olup kalkmadın müteessiren hâlik olmağın mûceb-i şer‘îsini taleb ederim deyü da‘vâya tasaddî edip lâkin hâlik-i mezbûrun vârisi Yahud tarafından sâbitü’l-vekâle vekîli lede’ş-şer‘-i enver zâhir ve mütehakkık olmadıkça mezbûr Avanis merkūm Toros ile husûmete ehil olmamağla merkūm Toros’a suâl tevcîh etmemeğin merkūm Avanis ber-vech-i muharrer bî-vech mu‘ârazadan men‘-birle mâ-vaka‘a bi’t-taleb ketb olundu. Fî 19 Safer sene [1]143. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Duhânî Mehmed Çelebi b. Ahmed, Kasım b. el-Hâc Hüseyin, Abdullah b. Mustafa.