Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 94 Hüküm no: 35 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çavuş Ağa b. Ramazan’ın Ak Şemseddin Mahallesi’ndeki arsasını Abdülaziz Efendi b. Mustafa Efendi’ye sattığı Mahmiye-i İstanbul’da Akşemseddin Mahallesi ahâlîsinden Ahmed Çavuş Ağa b. Ramazan nâm kimesne kendi nefsinden asîl ve zevce-i menkûhası Rukiye bt. el-Hâc Receb b. Abdullah nâm hatun tarafından bey‘-i âti’z-zikre vekîl olduğu İbrahim b. Ahmed ve Ebûbekir b. Abdullah nâm kimesneler şehâdetleriyle sâbit olmağla vekâleti meclis-i şer‘-i hatîr-i lâzımü’t-tevkīrde eşrâf-ı kuzâtdan bâ‘isü hâze’l-kitâb umdetü kuzâti’l-İslâm zübdetü vülâti’l-enâm Abdülaziz Efendi b. Mustafa Efendi mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre ile ale’l-iştirâki’s-seviyy yedimizde mülk ve hakkımız olup mahalle-i mezbûrede vâki‘ bir tarafdan Râbia nâm hatun menzili ve bir tarafdan Sandalcı Ahmed menzili ve bir tarafdan ba‘zan mahalle-i mezbûre müezzinine meşrût vakıf menzil ve ba‘zan Osman Odabaşı menzili ve tarîk-i âm ile mahdûd ve enkāz-ı mevcûde ve harâb taş duvar ve müşterek su kuyusunu müştemil mülk menzil arsamızı tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Abdülaziz Efendi’ye üç yüz guruşa bi’l-asâle ve bi’l-vekâle bey‘ ve temlîk eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz guruşu mûmâ-ileyh Abdülaziz Efendi yedinden bi’l-asâle ve bi’l-vekâle tamamen ahz u kabzeyledim. Fîmâ-ba‘d arsa-yı mahdûde-i mezbûre mûmâ-ileyh Abdülaziz Efendi’nin mülk-i müşterâsı olup bizim kat‘â alâka ve medhalimiz kalmamışdır. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 26 Safer sene [1]143. Şuhûdü’l-hâl: El-hâc Mehmed Efendi b. Mustafa, çukadâr el-Hâc İbrahim tâbi‘-i Mirzazâde Efendi, Süleyman Beşe tâbi‘-i mûmâ-ileyh, Ebûbekir b. Abdullah, Nuridede imâmı Mehmed Efendi, Molla Gürânî imâmı el-Hâc İsmail Efendi, İbrahim b. Ahmed.