Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 95 Hüküm no: 36 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın eşi Mustafa b. Hüseyin’den muhala‘a yoluyla boşandığı Muhâla‘a. Mahmiye-i İstanbul’da Âşıkpaşa Mahallesi’nde sâkine olup zâtı el-Hâc Mustafa b. Ahmed ve Mehmed b. Abdullah ta‘rîfleriyle mu‘arrefe olan Emine bt. Abdullah nâm hatun meclis-i şer‘-i şerîf-i enverde zevc-i mutallıkı işbu râfi‘u’l-kitâb Mustafa b. Hüseyin nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i zindegānîmiz olmamağla zimmetinde mütekarrir ve ma‘kūdun-aleyh altı yüz akçe mehr-i müeccelimin üç yüz akçesini bana def‘ ve teslîm ben dahi yedinden ba‘de’l-kabz bâkī üç yüz akçe mehr-i müeccelim ve nafaka-i iddet-i mu‘ayyene-i ma‘lûmemden üzerlerine, meûnet-i süknâm dahi kendi üzerime olmak üzere mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl hukūk-ı zevciyyet ve sâire müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Safer sene [1]143. Şuhûdü’l-hâl: İbrahim b. Mustafa, el-Hâc Mustafa b. Ahmed, Mehmed b. Abdullah, Mehmed Çelebi b. Abdullah, Ya‘kub b. Abdullah, Mustafa b. Hasan.