Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 95 Hüküm no: 37 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmal emini es-Seyyid Mustafa Ağa’nın Mehmed b. Ahmed üzerine açtığı diyet davasından men olunduğu Mahmiye-i İstanbul’da hâlâ bi’l-fi‘il beytülmâl-ı âmme ve hâssa emîni olan es-Seyyid Mustafa Ağa b. el-Hâc Ahmed meclis-i şer‘-i hatîr-i lâzımü’t-tevkīrde zikri âtî töhmet için on beş aydan berü sicn-i sultânîde mahbûs olan bâ‘isü hâzihi’l-vesîka Mehmed b. Ahmed nâm kimesne mahzarında bi’l-emâne üzerine da‘vâ ve takrîr-i kelâm edip mahmiye-i mezbûrede Karagümrük kurbünde bundan akdem cerîhan vefât eden Hüseyin b. Abdullah b. Abdülmennan sağ kaburgası altından bıçak ile darb ve cerh eylediğini bin yüz kırk bir senesi Zilhiccesi’nin on ikinci günü Ahî Çelebi Mahkemesi’nde nâibü’ş-şer‘ olan es-Seyyid Kelim Efendi huzûrunda ikrârına binâen târih-i mezbûrdan berü mahbûs olup ve maktûl-i mezbûrun kat‘â vâris ve vârisesi olmamağla dem ü diyeti cânib-i beytülmâle âid olup ve mezbûr Mehmed dahi müteveffâ-i mezbûr[un] cerh-i mezbûrdan nâşî müteessiren vefât eylediğini inkâr etmekle ben ber-vech-i muharrer müdde‘âmı isbâta havâle olunmuşidim hâlâ müdde‘âmı isbâtdan âciz olduğum cihetle mezbûr Mehmed tahlîf-i şer‘î ile tahlîf olunmak bi’l-emâne murâdımdır dedikde mezbûr Mehmed’e yemîn teklîf olundukda ol dahi hasbe’l-mesûl [yemîn] bi’llâhi te‘âlâ etmeğin mûcebince müdde‘î-i mezbûr bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 26 Safer sene [1]143. Şuhûdü’l-hâl: Yaşyemiş gümrükçüsü Mustafa Ağa, İbrahim b. Mehmed, Mustafa b. İbrahim, Mehmed Beşe b. Kadri, Berber Mustafa Çelebi b. ( ), Mehmed Çelebi b. Abdullah, du‘âcı İbrahim b. Mustafa.