Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 96 Hüküm no: 38 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime bt. Ömer ile el-Hâc Mustafa’nın kızları Zeyneb ve Ayşe’nin Hoşkadem Mahallesi’ndeki arsalarını Hüseyin Efendi b. Mustafa Efendi’ye sattıkları Mübâya‘a-i hisse. Mahmiye-i İstanbul’da Hoşkadem Mahallesi sâkinelerinden olup zâtları Mehmed Çelebi b. Ali ve diğer Mehmed b. Ahmed ta‘rîfleriyle mu‘arrefe olan Kerime bt. Ömer ve Zeyneb ve Âişe bintihâ el-Hâc Mustafa nâm hatunlar meclis-i şer‘-i hatîr-i lâzımü’t-tevkīrde işbu râfi‘u’l-kitâb fahrü’l-kuzât Hüseyin Efendi b. Mustafa Efendi mahzarında her biri ikrâr ve takrîr-i kelâm edip hâriciyyesinin arsası merhûm Koğacı Dede Vakfı’na beher şehr otuz akçe dâhiliyesinin ma‘lûmü’l-mikdâr arsası yine vakf-ı mezbûra beher şehr on beş akçe mukāta‘a ile tasarrufumuzda ve mâ‘adâ arsası akd-i âti’z-zikrin sudûruna değin ber-vech-i iştirâk yedimizde mülk ve hakkımız olup mahmiye-i mezbûrede Koğacıdede Mahallesi’nde vâki‘ bir tarafdan ba‘zan Azîze Hatun ve ba‘zan Leblebici zevcesi arsası ve bir tarafdan çavuşlar kâtibi Mustafa Efendi arsası ve bir tarafdan müezzine meşrûta vakıf menzil arsası ve bir tarafdan tarîk-i âm ile mahdûd ve mezbûr Mustafa Efendi tarafında vâki‘ mülk duvar ve bir bi’r-i mâ’yı muhtevî metrûk menzil arsalarından mülk olan arsamızı bi-cümleti’t-tevâbi‘ ve’l-levâhık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mûmâ-ileyh Hüseyin Efendi’ye iki yüz elli guruşa bey‘ ve temlîk ve teslîm vakfolan mârru’z-zikr arsamızı bâ-ma‘rifet-i mütevellî mûmâ-ileyh Hüseyin Efendi’ye meccânen ferağ ve tefvîz eylediğimizde ol dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eyledikden sonra semeni olan meblağ-ı mezbûr iki yüz elli guruşu mûmâ-ileyh Hüseyin Efendi yedinden bi-kadri’l-hısas tamamen ahz u kabz eyledik. Fîmâ-ba‘d zikr olunan arsa-yı memlûke cemî‘ müştemilâtı ile mûmâ-ileyh Hüseyin Efendi’nin mülk-i müşterâsı ve ma‘lûmü’l-mikdâr arsalar dâhil-i havza-i tasarrufu olup bizim kat‘â alâka ve medhalimiz kalmadı keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 Safer sene [1]143. Şuhûdü’l-hâl: Fahrü’l-müderrisîni’l-kirâm Tokâdî Mehmed Efendi, zübdetü’l-kuzât Mehmed Efendi b. Nurullah, Mahmud Beşe b. Mustafa, Kasab Hasan Beşe b. Şa‘ban, diğer Kasab İsmail b. İskender, Ahmed Beşe b. Mehmed, Hüseyin Beşe b. ( ).