Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 97 Hüküm no: 39 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arakil v. Şirvan’ın Kayseriye’nin Talas köyündeki evini Arzuman v. Kayabali adındaki Ermeniye sattığı Fi’l-asl medîne-i Kayseriye kazâsına tâbi‘ Darsiyak nâm karye ahâlîsinden olup mahmiye-i İstanbul’da Dülbendci Hüsam Mahallesi’nde mutavattın Arakil v. Şirvan nâm zimmî meclis-i şer‘-i şerîf-i enverde râfi‘-i hâze’s-sifr Arzuman v. Kayabali nâm Ermeni muvâcehesinde ikrâr ve takrîr-i kelâm edip medîne-i mezkûreye tâbi‘ Talas nâm karye hudûdu dâhilinde Hân Mahallesi’nde vâki‘ bir tarafdan Şirin ve bir tarafdan Kutluoğlu ve bir tarafdan Bahşi nâm zimmîler mülkleri ve bir tarafdan tarîk-i âm ile mahdûd bir sofa ve ahır ve iki kemerli bir kilâr ve bir şırahâne ve iki çardak ve havlu ve sundurma ve samanhâne ve üç kemerli kış evinin nısf-ı şâyi‘i mesfûr Arzuman’ın irsen yedinde mülk ve hakkı ve nısf-ı şâyi‘-i âharı merkūm Arzuman’ın li-ebeveyn karındaşı olup bundan akdem hâlik olan Oseb v. Kayabali v. Uğurlu’nun hayâtında ber-vech-i muharrer irsen yedinde mülk ve hakkı iken helâkinden üç ay mukaddem hâl-i hayât ve kemâl-i sıhhatinde zikr olunan nısf-ı şâyi‘i cümle tevâbi‘ ve levâhıkı ile yüz seksen beş guruş semen-i medfû‘ ve makbûza lede’ş-şuhûd bana bey‘ ve temlîk ve mahallinde kabza taslît eyledikden sonra ben dahi vech-i muharrer iştirâ ve temellük ve kabûl etmişidim. El-hâletü hâzihî merkūm Arzuman menzil-i mezkûrda halît olup tâlib ve râgıb olmamağla mârru’z-zikr nısf-ı şâyi‘i cümle tevâbi‘ ve levâhıkıyla yüz seksen guruşa merkūm Arzuman’a bey‘ ve temlîk ve mahallinde kabz ve tesellüm ve taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yüz seksen guruşu yedinden tamamen ahz ve kabzeyledim. Min-ba‘d zikr olunan nısf-ı şâyi‘-i âhar mezbûr Arzuman’ın şirâen mülk-i müşterâsı olup kat‘â benim alâka ve medhalim kalmadı. Keyfemâ-yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 Safer sene [1]143. Şuhûdü’l-hâl: es-Seyyid Osman Çelebi, İbrahim Çelebi b. Halil, Mustafa Ağa b. Hüseyin, Mustafa Beşe b. Abdullah, diğer Mustafa Beşe b. Abdullah, Osman Beşe b. Şahin, İsayi v. Sava, Dolet v. Şirin, Ayvaz v. Safar, Simogun v. Budak, Muslu v. Muslu.