Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 98 Hüküm no: 40 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Silek’in mecnûn olan oğlu Kistosdor v. Serkiz’e vasi tayin edildiği Nasb-ı vasî. Mahmiye-i İstanbul’da Mirâhor Mahallesi’nde mütemekkin Kistosdor v. Serkiz nâm mecnûnun emvâlini zabt ve ahvâlini hıfz ü hırâsete kıbel-i şer‘den bir vasî nasbı lâzım ve mühim olmağın mecnûn-ı mezbûrun babası mesfûr Serkiz v. Silek nâm zimmî her vechile ehil ve vesâyet uhdesinden gelmeğe kādir idiği zeyl-i vesîkada muharrerü’l-esâmî kimesneler ihbârıyla müte‘ayyin olmağın hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi mecnûn-ı mezbûrun emvâlini zabt ve ahvâlini hıfz u hırâsete vasî nasb ve ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fî 26 Safer sene [1]143. Şuhûdü’l-hâl: İbrahim Beşe b. Mustafa, Hüseyin Beşe b. Halil, Mehmed Çelebi b. Abdullah, Mehmed Çelebi b. Ahmed, İbrahim b. Mustafa.