Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 98 Hüküm no: 41 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun olan Kistosdor v. Serkiz’in arsa üzerindeki hissesinin ferağı için vasisi olan babasına izin verildiği Mahmiye-i İstanbul’da Mirâhor Mahallesi’nde mütemekkine iken bundan akdem hâlike olan Eznir? bt. Serkiz nâm Nasrâniyenin cünûn-ı mutbık ile mecnûn olan sadrî kebîr oğlu Kistosdor v. Silek [Serkiz] nâm mecnûnun babası ve kıbel-i şer‘den bâ-hüccet vasiyy-i mansûbu olan bâ‘isü hâze’s-sifr mesfûr Serkiz zimmî meclis-i şer‘-i hatîr-i lâzımü’t-tevkīrde takrîr-i kelâm ve tâ‘bir ani’l-merâm edip merhûm Devlethan nâm sâhibü’l-hayrın vakfından olup mahalle-i mezbûrede vâki‘ bir tarafdan Kasandra nâm Nasrâniye menzili ve bir tarafdan Nari nâm Nasrâniye menzil[i] ve bir tarafdan Sahak nâm zimmî menzili ve bir tarafdan tarîk-i âm ile mahdûd ma‘lûmü’l-müştemilât vakıf menzilin nısf-ı şâyi‘i bi’l-icâreteyn hâlik-i mezbûrenin ve nısf-ı şâyi‘-i âharı işbu hâzır bi’l-meclis Aritun nâm zimmînin tasarrufunda olmağla mezbûre Eznir? ba‘de’l-helâk menzil-i mezbûrdan mutasarrıfe olduğu nısf-ı şâyi‘i sadr-i kebîr oğulları diğer Aritun ve Kigork nâm zimmîler ile mecnûn-ı mezbûra intikāl edip lâkin menzil-i mezbûr harâb ve ta‘mîr ve meremmete birinde kudret ve vüs‘at olmamağla bir vechile kābil-i intifâ‘ olmayıp ve mesfûrûn Aritun ve diğer Aritun ve Kigork zimmîler hisse-i mezkûrelerin âhara ferağ ve kasr-ı yed murâd etmeleriyle binâen-aleyh mecnûn-ı mezbûrun nısf-ı menzil-i mezbûrdan ber-vech-i muharrer mecnûn-ı mezbûrun bir sehm hisse-i mezkûresini mesfûrûnun hisseleri ile ma‘an bedel-i misli ve ma‘rifet-i mütevellî ile âhara ferağ olunup bedel-i mezbûr i‘mâl olunmak mecnûn-ı mezbûr hakkında her vechile enfa‘ olmağla hakīkat-ı hâl vukūfu olan Müslimînden istihbâr olunup kıbel-i şer‘den bana izin verilmek bi’l-vesâye murâdımdır dedikde hakīkat-ı hâl zeyl-i vesîkada mastûrü’l-ism Müslimînden istihbâr olundukda fi’l-vâki‘ husûs-ı mezbûr bi’l-cümle vasiyy-i merkūmun takrîr-i meşrûhu üzere idiğini ihbâr etmeleriyle ber-vech-i muharrer vasiyy-i merkūma kıbel-i şer‘den izin-birle mâ-hüve’l-vâki‘ bi’t-taleb ketb olundu. Fî 28 Safer sene [1]143. Şuhûdü’l-hâl: İbrahim Beşe b. Mustafa, Hüseyin Beşe b. Halil, İbrahim b. ( ), Mehmed b. Ahmed, Abdullah b. Mustafa, Abdullah b. Nuh, Salih b. Süleyman.