Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 99 Hüküm no: 42 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anastaş v. İstiraci’nin el-Hâc Lütfullah b. el-Hâc Süleyman’a olan borcunu ödediği Mahmiye-i İstanbul’da Mesihpaşa Mahallesi’nde sâkin el-Hâc Lütfullah b. el-Hâc Süleyman nâm kimesne meclis-i şer‘-i şerîf-i enverde işbu bâ‘isetü’l-vesîka Anastaş v. İstiraci nâm zimmî muvâcehesinde ikrâr-ı tâm ve takrîr-i kelâm edip merkūm Anastaş zimmetinde bir kıt‘a hüccet mantûkunca bedel-i sulhden altı bin altı yüz akçe hakkımı beher mâh birer guruş edâ etmek üzere merkūm Anastaş’ı te’cîl ve taksît eylediğimde ol dahi kabûl ve meblağ-ı mezkûru ber-vech-i muharrer bana edâ ve teslîme ta‘ahhüd etmişidi hâlâ merkūm Anastaş meblağ-ı müeccel-i mezbûrun üç bin üç yüz altmış akçesini bana edâ ve teslîm ben dahi yedinden ahz u kabz edip bâkī kalan üç bin üç yüz kırk akçesini dahi tamamen bana edâ ve teslîm ben dahi vech-i muharrer yedinden ahz u kabz eylediğimden sonra husûs-ı mezkûra ve mukaddemâ kendiden iddi‘â eylediğim beş bin akçeye ve sâir beynimizde cereyân eden ahz u i‘tâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 Safer sene [1]143. Şuhûdü’l-hâl: Ömer Ağa b. Ahmed, İbrahim Çelebi b. Mehmed, Ahmed Çelebi b. Hasan, İbrahim b. Mustafa, Mehmed Çelebi b. Ahmed, Mehmed b. Ahmed, Ebûbekir Beşe b. Abdullah.