Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 100 Hüküm no: 43 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mizador v. Semercioğlu Agop’un oğlu Mıgırdıç’a Kiragos v. Serkiz’in vasi tayin edildiği Vilâyet-i Anadolu’da İznikmid kazâsına tâbi‘ Bahçecik nâm karye ahâlîsinden iken bundan akdem hâlik olan Mizador v. Semercioğlu Agop’un firâşından hâsıl ve zevce-i muhâla‘ı olup mahmiye-i İstanbul’da Gedikpaşa Mahallesi’nde sâkine iken hâlike olan Bağdagül bt. Vartan v. Haçador nâm Nasrâniyeden mütevellid oğlu Mıgırdıç nâm sagīrin tesviye-i umûruna ve hâlikân-ı mezbûrândan müntakil mâlını zabta kıbel-i şer‘den bir vasî nasb ve ta‘yîn olunmak lâzım ve mühim olmağla hâlike-i mezbûrenin li-ebeveyn ammi oğlu işbu bâ‘isü’s-sifr Kiragos v. Serkiz nâm Ermeni vesâyet-i mezkûre[nin] uhdesinden gelmeğe kādir ve her vechile mahall ü mustehık idiği zeyl-i vesîkada muharrerü’l-esâmî kimesneler ihbârlarıyla müte‘ayyin olmağın hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûrun tesviye-i umûruna ve ber-vech-i muharrer hâlikân-ı mezbûrândan müntakil mâlını zabt u hıfza mezbûr Kiragosu vasî nasb ve ta‘yîn buyurdukda ol dahi vesâyet-i mezkûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 29 Safer sene [1]143. Şuhûdü’l-hâl: Mehmed Çelebi b. Abdullah, Kādızâde İbrahim b. Mustafa, es-Seyyid Ali b. Ahmed, Ya‘kub b. Abdullah, Emir Ahmed b. Mehmed, Ahmed b. Hasan, Parsum v. Bağdasar, Vartan v. Novasird?, Aleksan v. Norşin, Serkiz v. Osep.