Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 100 Hüküm no: 44 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hüseyin’in kocası Hüseyin b. Mahmud’tan muhala‘a yoluyla boşandığı Muhâla‘a. Mahmiye-i İstanbul’da Sifrikoz Mahallesi sâkinelerinden olup zâtı el-Hâc Ahmed b. el-Hâc Ali ve Mustafa Yazıcı b. el-Hâc Şa‘ban nâm kimesneler ta‘rîfleriyle mu‘arrefe olan Rukiye bt. Hüseyin nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Hüseyin b. Mahmud nâm kimesne mahzarında ikrâr ve takrîr-i kelâm edip mezbûr Hüseyin zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh sekiz bin akçe mehr-i müeccelimin üç bin akçesini bana def‘ ve teslîm ben dahi yedinden ba‘de’l-kabz bâkī beş bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Safer sene [1]143. Şuhûdü’l-hâl: Ebûbekir Ağa b. Mahmud, Süleyman Odabaşı b. Ahmed, Mustafa Yazıcı b. el-Hâc Şa‘ban, İsmail Beşe b. Hüseyin, el-Hâc Ahmed b. el-Hâc Ali, Ahmed Beşe b. Abdullah el-mübâşir.