Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 101 Hüküm no: 45 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Ebûbekir b. Hüseyin’in evini Fâtıma bt. Abdullah’a sattığı Mahmiye-i İstanbul’da el-Hâc Hasanzâde Mahallesi’nde sâkin el-Hâc Ebûbekir b. Hüseyin nâm kimesne meclis-i şer‘-i şerîf-i enverde işbu bâ‘isetü’l-vesîka Fâtıma bt. Abdullah nâm hatun mahzarında ikrâr ve takrîr-i kelâm edip arsasının merhûm Na‘lıncı el-Hâc İsmail Vakfı’na yevmî bir akçe icâresi olup mahalle-i mezbûrede vâki‘ bir tarafdan Râbia Hatun menzili ve bir tarafdan Mehmed Çelebi tasarrufunda olan vakıf menzil ve bir tarafdan Hanife Hatun menzili ve bir tarafdan tarîk-i âm ile mahdûd fevkānî ve tahtânî iki bâb oda ve bir matbah ve bir tahta-bend ve bir kuyu ve bir mikdâr havluyu müştemil mülk menzilin ebniye-i memlûkesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Fâtıma Hatun’a iki yüz guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferağ ve tefvîz eylediğimde ol dahi ber-vech-i muharrer iştirâ ve tesellüm ve temellük ve tefevvüz ve kabz ve kabûl eyledikden sonra semeni olan meblağ-ı mezbûr iki yüz guruşu mezbûre Fâtıma Hatun yedinden tamamen ahz u kabzeyledim ba‘de’l-yevm ebniye-i menzil-i mahdûd-ı mezbûr merkūme Fâtıma Hatun’un mülk-i müşterâsı ve arsası hakk-ı müfevvezi olup benim kat‘â alâka ve medhalim kalmamışdır. Keyfemâ-teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Saferi’l-hayr sene [1]143. Şuhûdü’l-hâl: Mehmed Çelebi b. Veliyüddin, el-Hâc Fazlı b. Fazlullah, el-Hâc Ahmed b. Muslu, İsmail Çelebi b. Mustafa, İbrahim b. Mustafa Kādızâde, Mehmed Çelebi b. Abdullah, Mehmed Çelebi b. Hasan.