Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 101 Hüküm no: 46 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavraki v. Penaki’nin karısı Mariya bt. Andon’dan boşandığı Mahrûse-i Galata’ya tâbi‘ kasaba-i Kasımpaşa’da Tatavla Mahallesi’nde mütemekkine olup zâtı İbrahim Beşe b. İsmail ve Ahmed Beşe b. Abdullah nâm kimesneler ta‘rîfleriyle mu‘arrefe olan Mariya b. Andon nâm Nasrâniye meclis-i şer‘-i şerîf-i enverde zevc-i dâhili işbu râfi‘u’s-sifr İstavraki v. Penaki nâm zimmî muvâcehesinde ikrâr ve takrîr-i kelâm edip mezbûr İstavraki zevcim olup târih-i kitâb günü beni bâyinen tatlîk etmekle zimmetinde mütekarrir ve ma‘kūdun-aleyh üç bin akçe mehr-i müeccelim ile hukūk-ı zevciyyete ve gayra müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 Rebî‘ülevvel sene [1]143. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, İbrahim b. Ahmed, Kostantin v. Yani, Nikola v. Dimitri.