Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 102 Hüküm no: 47 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selanik eski kadısı Abdullah Efendi’nin Eyüp’teki evini el-Hâc Mustafa Efendi b. Ali’ye istiğlal yoluyla sattığı Sâbıkā medîne-i Selanik kādısı olup Mahmiye-i İstanbul’da Çerâği Hamza Mahallesi’nde sâkin umdetü’l-müvellâi’l-izâm fazîletli Abdullah b. el-merhûm Şeyh Mehmed Efendi b. el-merhûm Şeyh Ahmed Efendi taraf-ı şerîflerinden zikri âtî husûsa vekîlleri olduğu Mustafa Çelebi b. Mehmed ve Süleyman Çelebi b. Ahmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Mehmed Efendi b. Abdullah nâm kimesne meclis-i şer‘-i şerîf-i enverde bâ‘isü hâze’l-kitâb el-Hâc Mustafa Efendi b. Ali mahzarında bi’l-vekâle ikrâr-ı tâm ve takrîr-i kelâm edip müvekkilem-i mûmâ-ileyh Abdullah Efendi hazretleri yedlerinde mülk ve hakları olup medîne-i Hazret-i Ebî Eyyüb el-Ensârî -radiye anhu Rabbihi’l-Bârî- mahallâtından Bıçakcı Ferhad Mahallesi’nde vâki‘ bir tarafdan ba‘zan Ahmed Efendi veresesi menzilleri ve ba‘zan Bardakçı bahçesi ve bir tarafdan ba‘zan Kocadaşzâde? İshak ve ba‘zan Haffâf İbrahim veresesi menzilleri ve bir tarafdan ba‘zan başhalîfe Yahya Efendi ve ba‘zan İmâmzâde Ahmed Efendi bahçesi ve bir tarafdan tarîk-i hâs ile mahdûd dâhiliye ve hâriciyyede fevkānî ve tahtânî büyût-ı adîde ve hamam ve bahçeyi muhtevî menzillerini cümleti’t-tevâbi‘ ve levâhıkı ile iki bin guruşa mûmâ-ileyh el-Hâc Mustafa Efendi’ye bi-tarîkı’l-istiğlâl bey‘ ve teslîm eylediklerinde ol dahi ber-vech-i muharrer iştirâ ve tesellüm edip semen-i mezbûr iki bin guruşu yedinden tamamen ahz u kabz eylediklerinden sonra mûmâ-ileyh el-Hâc Mustafa Efendi menzil-i mezkûru ba‘de’t-tahliyyeti’ş-şer‘iyyeti’t-takābuzi’l-mer‘î târih-i kitâbdan bir sene tamamına değin müvekkilem müşârun-ileyh Abdullah Efendi hazretlerine üç yüz guruşa îcâr ve teslîm onlar dahi ber-vech-i meşrûh istîcâr ve tesellüm ve kabûl eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti şehri Rebî‘ülevvel sene 1143. Şuhûdü’l-hâl: Mefharü’l-kuzât Ahmed Efendi b. Mehmed Efendi, Şeyh Mehmed Efendi b. Şeyh Mehmed Efendi, fahrü’l-eşbâh Ahmed Ağa b. Mustafa, Mehmed Çelebi b. Mehmed, Mustafa Çelebi b. Mehmed, Mehmed Çelebi b. Abdullah, İbrahim Çelebi b. Mustafa, Bostanzâde es-Seyyid Mustafa Efendi, Süleyman Çelebi b. Ahmed.