Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 103 Hüküm no: 48 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıptî Bobine v. İstoyko’nun kızını evlenmek için kaçıran Moşile v. Balaban’nın kızı teslim etmesi Kıbtiyân tâifesinden râfi‘-i hâze’s-sifr Bobine v. İstoyko nâm zimmî meclis-i şer‘-i şerîf-i lâzımü’t-tevkīrde tâife-i mezbûreden Moşile v. Balaban nâm zimmî muvâcehesinde üzerine da‘vâ ve takrîr-i kelâm edip medîne-i İznikmid kazâsına tâbi‘ Mihaliç nâm karye kurbünde vâki‘ dağda ıyâlim ile sâkin olduğum hâlde târih-i kitâbdan yirmi gün mukaddem merkūm Moşile rüfekāsıyla çergemi basıp sulbiye kızım işbu Saltana nâm sagīreyi cebren bi-gayr-ı hakkın ahz ve firâr etmeleriyle suâl olunup sagīre-i mezbûreyi bana teslîme tenbîh olunması matlûbumdur dedikde gıbbe’s-suâl mezbûr Moşile cevâbında sagīre-i mezbûreyi tezevvüce tâlib olduğumda mezbûr Bobine bana teslîm ve murâd ettiğim mahalde kendiye akd ve tezvîc etmek üzere bana izin vermekle ben dahi sagīre-i mezbûreyi ahz ve ismi ma‘lûm olmayan imâm ve cemâ‘at ma‘rifetiyle kendime akd ve tezvîc eyledim deyü def‘ edicek gıbbe’l-istintak ve’l-inkâr mezbûr Moşile’den def‘-i mezkûrunu mübeyyine beyyine taleb olundukda ityân-ı beyyineden izhâr-ı acz ile istihlâf ettikde fi’l-hakīka kızı mezbûreyi ber-vech-i muharrer kendiye akd ve tezvîc etmek üzere teslîm ve izin vermediğine mezbûr Bobine’ye yemîn teklîf olundukda ol dahi hasbe’l-mesûl yemîn bi’llâhillezî enzele’l-İncile alâ-İsâ -aleyhi’s-salât ve’s-selâm- etmeğin mûcebince sagīre-i mezbûreyi babası müdde‘î-i mezbûra teslîm ve bilâ-beyyine mezbûr Moşile bî-vech mu‘ârazadan men‘-birle mâ-vaka‘a bi’t-taleb ketb olundu. Fî-selhi Saferi’l-hayr sene [1]143. Şuhûdü’l-hâl: Çeribaşı İbrahim b. Ömer, Yusuf Bey b. Mustafa zâbitân-ı kıbtiyân, Ömer b. Hüseyin, Salih Çelebi b. Mehmed, Derviş b. Ahmed, Mehmed b. Ahmed, İbrahim Çelebi b. Mustafa, Mehmed Çelebi b. Abdullah.