Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 103 Hüküm no: 49 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Mustafapaşa Mahallesi’nden Tanaş v. Yuvan ile Yorgaki v. Dimitraki’nin mahzenden dolayı olan davalarında sulh oldukları Mahmiye-i İstanbul’da Lonca kurbünde Küçük Mustafapaşa Mahallesi ahâlîsinden Tanaş v. Yuvan nâm zimmî meclis-i şer‘-i hatîr-i lâzımü’t-tevkīrde yine mahalle-i mezbûre mütemekkinlerinden bâ‘isü hâze’s-sifr Yorgaki v. Dimitraki v. Sava nâm zimmînin zevcesi ve tarafından husûs-ı âti’z-zikre vekîl-i şer‘îsi Tarandafilo bt. Nozak? nâm Nasrâniye muvâcehesinde ikrâr ve takrîr-i kelâm edip müvekkil-i mesfûr Tanaş zimmînin mahalle-i mezbûrede vâki‘ ma‘lûmü’l-müştemilât mülk menzili benim mülk menzilime muttasıl olmağla menzil-i mezbûru tahtında vâki‘ bir bâb kârgîr mahzen kadîmden berü benim menzilime tab‘iyyet ile zabt ve tasarruf olunageldiğinden gayrı işbu yedimde olan mülknâme hüccetlerimde dahi mastûr ve mukayyed olup mahzen-i mezbûr mülk-i müşterâm olmağla ber-vech-i muharrer mehzen-i mezbûru zabt ve tasarruf murâd eylediğimde müvekkil-i mesfûr mahzen-i merkūm mücerred benim mülküm olan menzilim tahtında olmağla benim olmak iktizâ eder deyü mahzen-i mezbûru tasarrufuma mümâna‘at eylediğinden mâ‘adâ menzilin bir aded penceresinden benim menzilimin makarr-ı nisvân olan mevâzi‘i görünür deyü benden da‘vâya tasaddî etmekle beynimizde münâza‘ât-ı kesîre cereyân etmişidi el-hâletü hâzihî vesâtet-i muslihîn ile mârru’z-zikr mahzen-i mezbûru tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz guruşa müvekkil-i mesfûra bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezbûr otuz guruş mütâlebesinden müvekkil-i mesfûr ile zevcesi mezbûreyi ibrâ-i âmm-ı râfi‘u’l-hısâm ile ba‘de’l-ibrâ zikri mürûr eden bir aded pencereme dahi tahta perde havâle tutup zararını def‘a ta‘ahhüd etmemle min-ba‘d birbirimiz ile vechen mine’l-vücûh kat‘â da‘vâ ve nizâ‘ ve husûmetimiz kalmamışdır dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti şehri Rebî‘ülevvel sene [1]143. Şuhûdü’l-hâl: İbrahim b. Mustafa, Mehmed Çelebi b. Abdullah, diğer Mehmed b. Ahmed, Abdullah b. Mustafa.