Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 104 Hüküm no: 50 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıptî tâifesinden İsmihan bt. Bayram ile Halil b. Ali’nin muhala‘a yoluyla boşandıkları Mahmiye-i İstanbul’da Manisalı Çelebi Mahallesi sâkinelerinden olup zâtı İbrahim Çelebi b. Mustafa ve Abdullah Çelebi b. Mustafa nâm kimesneler ta‘rîfleriyle mu‘arrefe olan İsmihan bt. Bayram nâm Kıbtiye meclis-i şer‘-i şerîf-i enverde zevc-i dâhili işbu râfi‘u’l-kitâb Halil b. Ali nâm Kıbtî mahzarında ikrâr ve takrîr-i kelâm edip mezbûr Halil zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere mezbûr Halil ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyyet ve sâire müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Rebî‘ülevvel sene [1]143. Şuhûdü’l-hâl: Mehmed Çelebi b. Abdullah, Ahmed Çelebi b. Hasan, Abdullah Çelebi [b.] Mustafa, Salih Çelebi b. Süleyman, Ali Çelebi b. Mustafa, İbrahim Çelebi b. Hüseyin.